Khanapara, Jan 04: New Delhi-ni Association of Indian Universities (AIU)-ni dakchakatani ning·o ia January 4 tarikoni 8 tarikona kingking Ri-Bhoi a·jani Khanapara, 9th Mile-o donggipa University of Science and Technology Meghalaya (USTM)-ni campus-o salbongana ong·atenggipa chang 36-gipa Inter-University North East Zone Youth Festival “YUVA PRATIBHA” -ko Butbar saloni a·bachengchakataha.
Programko, dingtang dingtang university-rangoni bakko ra·tokenggipa chatrorang aro gipin official-rangni dongpaanio, USTM-ni Vice Chancellor, Prof G. D Sharma, Varanasi-ni IIT (BHU)-ni Prof S. K Sharma, jean AIU-ni Observer-ba ong·a, USTM-ni adivisor Dr RK Sharma, USTM Cultural Forum-ni Organizing Secretary aro Convener, Ma Polly Borgohain-maangni jakchi USTM aro AIU-ni nisanko songdoachi a·bachengaha.
Ia tom·bimonganiko a·bachengatanio USTM-ni Chancellor, Mahbubul Hoque-ni jinmana aganprakatengon, kal·suaani, jatni daka-rikani aro sea-jotanirangchi a·gilsak gimikni manderangko apsan meli-nangrimatna gita ama ine parakatan baksa, salgro-salaram a·ja gimikchini chatro-chatrirang gimik dakgipa jatan ia university-o poraitokengani gimin chingni University, kal·susaani aro daka-rikanirangko tang·doatna gita miksongani gnang kamko ka·skaenga aro ia dal·begipa susaaniko pilak chatro-chatrirangna soka-chakna gita man·enganio chinga kusi ong·a ine ua parakataha.
Ia youth festival-o bakko ra·tokenggipa mitam university-rangoniara, Gauhati University, Cotton University, Bodoland University, ICFAI University, Tripura, Tezpur University, Dibrugarh University, National Sports University, North Eastern Hill University, Rajiv Gandhi University, Dhanamanjuri University, Manipur University, Manipur University of Culture, Royal Global University, Indian Institute of Information Technology Guwahati, iarang ong·a.
Ia salbongana kingking ong·atenggipa programo susaatgniparangara – Western aro Classical-o doka-damani aro gitrangko ring·susaatani, jinma dol dake chroksusaani, tamasa dakani, Mehandi, On Spot Painting, Elocution, Collage Making, Spot Photography, Clay Modeling, Debate, Folk Orchestra, Cartooning, Rangoli, Quiz, Mime and Mimicry iarangan ong·a.
