Tura, Dec 10: Netherlands a·songoni mingsinggipa Vengaboys dolni ga·subee gitrangko ring·e manderangko an·saoatanichi ia bilsini Me·gong Festival-ko Sonibar walo matchotataha.

Ia bon·kamgipa salo, Garo Hills-onisan ong·aigija gipin biaprangoniba hajalni hajal manderang, Me·gong Festival-ko nina gita Jengjal-ni Baljek airport-ona tom·chimongbatokaha aro uandaken Garo Hills-o skanggipa changna baditaba kontarangna garirangni apchangket ong·e donganikoba nikna man·aha.

Ia bon·kamgipa attamo, Vengaboys dol baksana Garo Hills-oni mingsinggipa Riprap, Nokpante, The Dopos, Chegim Durama aro uandakgipa dingtang dingtang dolrangni git ring·e mesokanirangkoba manderang nikna man·aha aro ia Me·gong Festival-o dingtang dingtang cha·ani ringanirangkoba cha·e ringe nina cholrangko man·tokaha.

Indake ong·genchimoba, ia bilsini Me·gong Festival-ona lakni lak manderang sokbatokahani gimin ia program matchote re·pilengmiting somoio, garirang apchangket ong·enba manderang konta 7-mang ong·pile ramaon jachange dongtokna gita nangskaaha.

Baljek Airport-oni garirangko re·ongkatpilna Williamnagar rama gita watskaahachim indiba ia ramani bako chu·onga gita traffic police-rangko donjahani a·sel aro manderangni sengnapgija dake garirangko salahani a·sel Jengjal bibraonan garirang kontadokmangnade apchangket ong·e dongna nangtokaha.

Baljek airport-oni Williamnagar rama gita Tura-chipakna re·angenggipa garirang, riting gittam aro riting brirang ong·pile salangahani a·sel Jengjal bibrachipakni Williamnagar-chipakna re·angskaenggipa garirangde re·na biap dongjae, ua biapon jachange dongna nangtokaha aro uandaken ia biapon hajalni hajal garirang apchangket ong·e dongna nangtokaha.

Me·gong Festival-o traffic-ko nitimna dongipa manderangni u·iatani gitade, Baljek airport mikkango garirangko, ramani paktangtangchian donahani a·selba garirang re·na man·jae, ia biapo ‘traffic jam’ ong·na a·bachengahachim.

Ia program-ona Assam-chipakni Paikan gita, Shillong-chipakni Williamnagar gita aro Garo Hills-ni gipin bakrangoniba Tura gita re·batokaha aro hajalni hajal garirang, re·ruraanio neng·nikanirangko chagrongna nangtokaha ine traffic-ko nirokna dongipa manderang parakataha.

Ia Me·gong Festival-ko nina re·bagipa bang·a manderangan, ia biapo garirangni apchangket ong·ahani a·sel, program-ko nigija re·angpiltokna nangaiaha ineba uamang aganaha.

Ia Me·gong Festival-ko Sonibar attamo nina re·anggipa mitam manderangni parakatani gitade, uamang 9:30 bajimangon Baljek airport-oni re·ongkatahachim indiba garirangni iandake apchangket ong·ahani a·sel pring 4:30 bajimangosa noktangtangona sokangtokaha.

Iakoba poraie nina man·gen: Me·gong Festivalo Armaan Malik an·saoata