Shillong, May 26: Voice of the People’s Party (VPP)-ni president aro Nongkrem constituency-ni MLA Ardent Miller Basaiawmoit, saksa ‘crore-pati’ ong•eba party-ni tom•anirango pangnan manderangoniko tangka paisa gilamronga ine Hynniewtrep National Liberation Council (HNLC) bobil dol matnangataha.
HNLC-ni general secretary Sainkupar Nongtraw-ni parakatani gitade, 2023 bilsini Assembly election-na VPP-ni president Ardent Basaiawmoit-ni affidavit ka•anio, gong crore 1.49-na baten gam-jinrang donga ine mesokaha indiba VPP-ni tom•anirangko ong•ataniode pangnan manderangoniko tangka paisa gilamronga.
“Election Commission-ni affidavit-ko nipilgenchimode, VPP-ko dilenggipa manderangni man•e cha•ani aro party-ni manderangna mesokanio namen dingtanggrikaniko nikna man•a. VPP-ni president Ardent Miller Basaiawmoit pangnan party-ni tom•anirangko ong•atanio, hajira ka•e cha•enggipa aro game ge•e cha•enggipa manderangni neng•bee man•gipa tangka paisarangoniko on•gilchina didironga indiba uni election-na affidavit ka•anio mesokani gitade, uo gong 1,49,15,089-ni gam-jinrang donga,” ine Nongtraw parakataha.
2023 bilsini election-o Basaiawmoit-ni affidavit ka•ani gitade, uno gong 1,49,15,089-ni chu•gimik gam-jinrang baksana Laitkor-o crore 1-ni dongchakgipa nok, lak 35-ni a•arang, lak 6.7-mang ong•gipa Jeep, Bolero aro Royal Enfield garirang, lak 1.92-ni sonarang aro gong lak 6.15 tangkarang bank-o aro nogot donga ine HNLC-ni general secretary parakataha.
Indita gam-jinrang dongeba VPP-ni dilgiparang, manderangko togie, tangka paisa gilamenga ineba Nongtraw matnangataha.
A•doko aro songsalo kangal cha•a-sianiko bon•atna, tom•tomani, namroro silroroani aro jatni daka rikanirangko ripinge rakkina ine 2023 bilsini February 15 tariko VPP-ni ku•rachakanggipa election manifesto-ni gimin janapatengon, ‘VPP, kangal cha•a siako bon•atna dakgrikengama ma iani namgniko man•enga’ ine HNLC-ni general secretary sing•doataha.
Nongtraw-ni parakatani gitade, Ardent Miller Basaiawmoit-na agreba, VPP-ni gipin dilgiparang, chong•motan Mawryngkneng-ni MLA Heaving Stone Kharpran-o crore 1.09-ni gam-jinrang, Mawlai MLA Brightstarwell Marbaniang-o lak 41.85-ni gam-jinrang aro Shillong MLA Adelbert Nongrum-oba lak 13.61-ni gam-jinrang donga ine election commission-na affidavit ka•anio parakaha.
Ia MLA sakbrian, ‘0 income’ ba maming man•gnirang dongja ine affidavit-o janapaha ine parakatengon, “Uamango man•gnirang dongjagenchimode uamangni janggi tangani bewalrangna sawa tangka paisarangko on•enga? Banoni tangkachi indita damni bosturangko brena man•aha, banoni tangkachi gari gorarangna korosko man•enga aro bani tangkachi election-na campaign-rangko ka•aha?” ine HNLC sing•doataha.
Na·simang iakoba nina man·gen:
Na·simang iakoba poraina man·gen: Meghalaya-ni PHE Minister JJM-scheme-ni ning•o kam ka•anirangko nipiltaianiko dakanga
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
