Tura, June 11: Wachi kari soka changantian Garo Hills-o aro mongsongbate a•kawe jolrango chirang bananichi manderang janggirangko gimaatna nangengani gimin aro neng•nikanirangko chagrongna nangtokengani gimin Meghalaya a•dokni Chief Minister Conrad K Sangma, Garo Hills-ni dingtang dingtang biaprango relief camp ba manderangko naljoke rakkina man•gipa biaprangko sandikame donchina Garo Hills-ni official-rangko ge•etangaha.
Sukrobar salo, a•dokni Chief Minister, Garo Hills-ni dingtang dingtang biaprango chi bananirangchi aro a•arang be•anichi neng•nikanirangko chagrongna nangenggipa manderangni gimin ma•sie ra•na gita Tura-ona re•bae, Garo Hills gimikni district official-rang baksa tom•e chanchirimangaha aro mikkangchi iandakgipa neng•nikanirangko maikai chel•chakna man•gen, uarangni gimin chanchirimangaha.
Ia tom•anio West Garo Hills, South Garo Hills aro South West Garo Hills a•jani official-rang Chief Minister baksa chanchirimangengon, a•jatangtango manderangni neng•nikanirangko namatna gita mai ja•kurangko de•engachim, uarangni gimin talataniko on•angenba, da•o mikkarang komiangenganichi chi bananirangba komiroroangengaha ine janape on•angaha.
Garo Hills-ni a•ja damgittamo mikkarang jimbee waangangchi baditana kingking rama jal•langrang, nok-jamrang aro manderangni gam-jinrang nosto ka•ako man•ahachim, uarangni giminba a•ja damgittamni official-rang Chief Minister-na talate on•angaha.
Mikkarang jime waanganio neng•nikanirangko man•enggipa nokdangrangna ta•raken nanga gita dakchakanirangko on•china gitaba Chief Minister, official-rangna ge•etaniko on•angaha.
Mikkarang waanganio nosto ong•atako man•gipa bijoli line-rang aro rama jal•langrangko ta•raken tarie on•pilchina gitaba Chief Minister, official-rangko ge•etangaha.
Wachi kario relief camp dakkamna man•gipa biaprangko sandichina official-rangko ge•etangengon, gipin somoirangode ia biaprangko dingtang kamrangnaba jakkalskana man•aigen ine Chief Minister aganaha.
Tom•a matchotani ja•mano ua Tura Civil Hospital-onaba re•ange, adita salrangna skang a•a be•dapa man•e sianggipa nokdang ge•sani manderangkoba grongeaha aro uamangna sorkarini gita on•enggipa tangka paisarangkoba on•angjolaha.
Budbar walosan mikkarang jime waangani ja•man, West Garo Hills a•jani Gambegre jolo nokdang ge•sako a•a be•dapanio ia nokdangni mande sakgittam so•otako man•ahachim aro saksade bilongbee saknaanirangko man•ahachim.
