Resubelpara, Mar 11: North Garo Hillsni Dainadubi sepango donggipa Wageasi songni North View Public Schoolko sukrobar salo North Garo Hillsni Additional Deputy Commisioner Shri Zenitsky Sangma Damas constituencyni MDC Shri Pardinand D Shirani dongpaanio oprake on•angaha.

“Namgipa aro chu•sokgipa chatro-chatrirangko ong•katatnade a•bachengaonin bi•sarangko tarianian ong•a. Ia wilwilao ia indakgipa skulko kulina man•aniara ia jolo songsonggiparangna bang•a namgnirangko ra•bagen ine tom•anio North Garo Hillsni ADC Zenitsky Sangma aganaha. Tom•anio dongpae Damas constituencyni MDC Pardinand D Shiraba aganpaengon, ” Skulko chalaianiara namen rakbegipa aro an•tangtangko on•kange kam ka•na nanggipa ong•a. Skigiparang, chatro-chatrirang aro ma•a-pa rang meli-nangrime ka•genchimode namgipa chatro-chatrirangko ong•katatna man•chongmotaia” ine aganpaaha.

Ia tom•anio songni-nokni manderang, nokma-sordar-rang, mondolini pamongrang aro dingtang dingtang dilgiparang bak ra•angpaaha.