Tura, Jan 30: India a·song gimikon konchi sabisini bidingo mikrakataniko on·engani gimin West Garo Hills a·jaoba ia konchi sabisini bidingo manderangna mikrakataniko aro u·i-ma·siatanirangko on·na gita da·al Sonibar salni bako SPARSH Leprosy Awareness Campaign-ko Tura-ni Embee Rosebud High School-o a·bachengatangaha. Ia SPARSH Leprosy Awareness Campaign-ko Mahatma Gandhi-ni siani salko gisik ra·na gita Anti-Leprosy Day-ko maniani bak gita da·al salni bako a·bachengataha.
Ia program-ko ong·atanio West Garo Hills a·jani Deputy Commissioner Ram Singh, tom·anio bak ra·giparangna aganprakatengon, ia salara Mahatma Gandhi-ni siani sal ong·e Martyr’s Day aro Anti-Leprosy Day dake manironggipa sal ong·ani gimin ia program-ko a·bachengatna nambegipa somoi ong·aha ine parakangaha.
Konchi man·gipa manderangko bang·a manderangan mitchitokani gimin aro galchipna jotton ka·rongani gimin an·tangni suk ong·gijaniko parakatengon, konchi man·gipa manderangko gronganichi ba salamrangko ka·anichide batrorona man·ja ine Deputy Commissioner, konchi man·gipa manderangko mitchijachina aro galchipjachina didiangaha.
Ia konchi sabisiara sanna man·gipa sabisisa ong·a ine talatangengon, ia sabisiko man·on ta·raken doctor-rangona re·ange sanna bananirangko ra·china gita Singh didiangaha. Ia sabisini bidingo saksa sakgipinrangna u·irikrikatskachina gitaba ua didiangaha.
Ja·mano, West Garo Hills a·jako konchi sabisi grigipa ong·atna gita Deputy Commissioner, tom·anio bak ra·giparangko ku·mikchetdilangaha.
Ia program-ko ong·atanio dongpae bakko ra·anggipa gipin manderangara, Healh Services-ni Joint Director Dr Minakshi A Sangma, West Garo Hills a·jani District Medical & Health Officer Dr MR Sangma, Leprosy Control Unit-ni in-charge aro senior medical & health officer Dr BMG Momin aro gipinrang ong·a.
