Shillong, Sept 29: Hynniewtrep A·chick National Movement (HANM), Bristibar salo a·dokni Home Minister Pa Lakhmen Rymbui-ko grongangenba West Jaintia Hills district-ni Muktapur songo songdongengipa ramram manderangko Border Security Force (BSF)ni dingtang dingtang dake neng·nikatanirangko on·enganiko una u·iatangan baksa iako nirokatchina gita mol·molangaha.
Iani bidingo HANM War Jaintia Circle-ni padot Shaniahlang Suchen-ni aganani gita, Bangladesh a·song baksa sima-ari chapchap a·palrangko game-ge·e cha·enggipa pnar manderangko changantian BSF sipairang neng·nikatrongenga.
Uni matnange agangangkuani gitade, salanti hajira ka·e cha·gipa manderangko BSF sipairang salantin gita dakpile neng·nikataniko on·enga aro nangchongmotgipa bosturangko salruragipa garirangkoba nangai-nangjai changni-chang sandirikkitataniko dakrongenga.
“BSF sipairangni iandake songni ramram manderangko kragija dakanichin Muktapur jolni wilwilao donggipa bang·a songni manderangna, mongsongbate kamrangko ka·na noktangoni ong·katna nanggiparangni gisepo jajrenganikoba ong·atenga” ine Suchen parakataha.
Iani gisepon, HANM-ni padot Lamphrang Kharbani-ba, sima jolo songdongenggipa manderangni kosako BSF-ni sinjetaniko on·ani da·osan ong·aija, uni gimin a·dok sorkari iako BSF-ni chubatgipa gadangona ra·ange agangrikaniko dakna gita nangengaha ine didiangaha.
Indake ong·engon, Muktapur jolni wilwilao songdongenggipa manderangko BSF-ni kragija neng·nikatanirangko on·enganiko dontongatchina BSF baksa agangrikaniko dakchina Home minister-ko grongani somoio uo mol·molaha ineba Kharbani talataha.
“Sima-ari jolrango nitimaniko dakatenba songni manderangna pilak chel·chak-nirokataniko on·engani gimin aro songsul a·song Bangladesh-chini niam gri Meghalaya-ona napdrabagiparangko champengsoenganina sima jolo songdonggipa manderang BSF-ko mittelpilna nangnika, indiba uamangni rokom-rokom dake neng·nikatanirangko on·aniko ra·chakna man·jawa, uni gimin ia mamlako anti-gnini gisepon namgrikatchina gita chinga home minister-ko didiaha aro iani gisepon apsanko dakangkuaia ong·ode HANM, niamko jaktango ra·na draatako man·gen” ineba Kharbani mikrakataniko on·angaha.
