Williamnagar, Feb 2: Assembly election-o National People’s Party (NPP) doloni susana am·enggipa sakgittam candidate-rang Williamnagar-o an·tangtangni nomination lekkarangko Bristibar salo on·angtokaha.
Skanggipao, Williamnagar constituency-ni NPP candidate Pa Marcuise N. Marak an·tangni nomination lekkako on·angaha, uni ja·man Songsak-oni Pa Nihim D. Shira aro Rongjeng-oni Pa Jim M. Sangma-maangba apsandake an·tangtangni nomination-rangko on·angtokaha.
Nomination lekkarangko on·angani somoio Hub News-ni uamango adita sing·rokanirangko dakanganio, Songsak-o TMC-ni Dr Mukul Sangma baksa susagrikanio maidake amna ka·dongenga ine Pa Nihim D. Shira-ko sing·on, constituency-ni manderang ianpakode Dr Mukul-o ka·donganirang namen komiaha aro bilsi 30-na kingking Songsak-ni manderang a·palonikosa sroe jakkalaha, uni gimin maidakgipa kamrangko uamang ka·ahachim manderangba pilakkon cha·tote niktokaha ine aganenba, uni gimin ia changode songtangni depantenan pu·one namgipa result-ko on·chongmotgen ine ua aganchakaha.
Songsak-ni manderang nang·ko seoke cheatgenchimode, nang·ni skanggipa dakna miksonganira maia ine sing·on, an·tangni MLA ong·miting somoio ua warachakgipa dolo donge je kamrangko chu·sokatna man·jahachim ua kamrangko chu·sokatna aro Songsak jolo manderangni janggi tanganiko ra·dona miksongani donga ine aganchakaha.
Unomiting, Williamnagar-ni NPP-ni candidate Pa Marcuise N Marak-ko na·a bilsi 5 na sasonni bilko jako ra·gipa dolo donge Williamnagar Constituency-na chu·onga gita kam ka·aha ine an·tangko chanchiama ine sing·on, beben ua man·adipet a·jatangni namroro-silroroanina kamko ka·aha indiba bilsnirangna sajinma sokani a·selo bang·a kamrang ja·donggaataniko man·ani gimin chu·soksrange ka·na man·aha inede aganjawa ine aganchakangskaaha.
Nang·ni MLA ong·e dangdike on·ani somoio Williamnagar constituency-na kam ka·arangoni badiako na·a suk ong·nikbataha aro Balsrigittim aro Warima songo a·ani mamlarangko manderang baksa songgigrikaniko dakanio uamang kusi ong·a ine na·a chanchiama ine sing·skaon, ua an·tangni pilak kam ka·anirangkon suk ong·nikaiaha ine aganchakan baksa, a·ani mamlao songgigrikaniko dakchina manderangni dabiani giminsa ua iako dake on·aha aro iana manderangba kusi ong·tokaiaha, maina batanggimin salrangode Balsrigittim aro Warima-ni a·arango donggipa manderangko sorkarini a·ao niam gri dongdragipa inesa bimingrangko man·aiachim indiba da·ode a·ana songgigrikani dakmane uamangna pattarangkoba on·ahani gimin manderang kusi ong·tokenga ineba ua aganchakaha.
Re·baenggipa 27 tariko na·a badia dol baksa rakbate susagrikna nanggen gita nika ine sing·on, Williamnagar-ni gitcham MLA aro Congress dolni candidate Ma Deborah C Marak baksa ong·gen ine aganchakangengba, TMC-ni giminde na·a jeoba aro jechiba re·ange sing·aibo, manderang ia dolni gimin aganan dongjaode aro janapan griode maidake ua TMC baksa dakgrikgen ine Pa Marcuise, TMC dolmingde na·a an·tangko indakpile dakrikna nangjawa gita nikama ine sing·anina aganchakangjolaha.
