Shillong, Oct 13: West Jaintia Hills district-ni ning·o Assam a·dok baksa sima-arini bidingo kajia-golmal gnanggipa biaprangko nirok-sandina gita Urban Affairs minister Pa Sniawbhalang Dhar-ko dilgipa ong·e songako man·gipa regional committee-ni damsan asonge chanchirimaniko mija October 6 tariko ong·atangaha.
Iako Butbar salo u·iatanganio, Block-I-ni a·jao simani bidingo golmal gnanggipako ra·e committee chanchirimaha aro ua biaprangni gimin chu·gimikko namedake tale ra·chengna aro ma·sie ra·anirangko dakna gita tik ka·aha ine talatenba, iako dakna somoioko nanggen indiba kamrangko ka·engaha ine a·dokni Home Minister Pa Lahkmen Rymbui parakataha.
Sima-ari jolo songdongenggipa manderangni nangnika gitan simani golmalrangko namgrikate donna gita committee jotton ka·anggen. Unbaksana, Assam aro Meghalaya a·dok damgnini sorkarirangba sima-arini golmal-gondogolko namatna gita tik ka·manaha ineba Pa Rymbui agandapataha.
Songsul a·dok Assam baksa sima-arirangko sualgrike donganichi kajia-golmalrang dongbatgipa biap damdokni gimin nirok-sandie nanga gita kamrangko ka·ani ja·man uni report-rangko sal 45-ni gisepon sokatchina, a·dok sorkari re·anggipa September 26 tariko ge·gittam regional committee-rangko songahachim ine nikatna gita man·gen.
A·dok damgnio meligrikna man·jaenggipa damdok a·jarangoniara, West Khasi Hills District-oni Langpih-ko man·chape, Ri-bhoi district-oni, Borduar, Nongwah-Mawtamur, Deshdoomreah, Block-II, West Jaintia Hills district-oni aro Block-I, Psiar-Khanduli iarang ong·a.
