Shillong, Nov 15: West Khasi Hills a•jao donggipa Nongkhnum chichango tourism-ko tang•doatna gita a•dok sorkari, gong kror 13 tangkarangko chamgen ine Sombar salo, Meghalaya a•dokni Chief Minister Conrad K Sangma parakataha.
Asia gimiko Assam a•dokni Majuli chichangni ja•man Nongkhnum chichangan gnigipa dal•batsranggipa chibima chichang ong•engachim ine nikna man•a. Sombar salo a•dokni Chief Minister, an•tangni nokdang baksa ia chichangko nina re•angaha aro uni ia chichangona re•angani somoio West Khasi Hills a•jani official-rangba dongpaaha.
Nongstoin-o a•dok sorkarini a•bachengatgipa Farmers’ Collectivisation for Upscaling of Production & Marketing Systems (FOCUS) program-ni ning•o bikotgipa Producers Group (PG)-rang baksa agangrikengmiting somoio a•dokni Chief Minister, ia Nongkhnum chichangko namdapatna gita gong kror 13 tangkarangko chame on•gen ine parakangaha.
Ia tom•anio ua game ge•e cha•enggipa manderang baksa agangrikengon, a•doko game ge•e cha•enggipa manderangni janggi tangani gadangko namdapatna gita sorkari gong kror 200-ko chame donaha ineba Chief Minister parakataha.
Game ge•e cha•enggipa manderangni neng•nikanirangko aro nanganirangko ma•sina sorkari jotton ka•enga aro game ge•e cha•enggipa manderangna namgni ong•nagipa program-rangko sorkari ra•gatna jotton ka•enga ineba Sangma parakataha.
West Khasi Hills a•jani rama jal•langrangko namdapatna sorkari gisik on•e kam ka•enga ine janapatengon, Greater Nongstoin Water Supply Scheme-ba da•o matchotangengaha aro bakan ia scheme-ko kulie on•gnok ine Chief Minister parakataha.
West Khasi Hills a•jao Producers Group-rangko ia 2021 bilsini March jao Mawshynrut Block-o a•bachengahachim aro uandaken ia 2021 bilsini July ja dipetan Nongstoin Block-oba a•bachengate da•o dol 183-mangni gita PG-rangko bikotahachim.
Ia tom•anio dol 36 PG-rangna gimik gong 21,95,000-ni cheque-rangko FOCUS program-ni ning•o Chief Minister aro jolni MLA Macmillan Byrsar-ni jakchi on•angaha.
Chief Minister-ni West Khasi Hills a•jaona re•anganio ua Nongstoin-Wahkaji aro Nongstoin-Nongkhnum ramarangkoba niangjolaha.
