Nongstoin, Feb 19: Mingsa a·sel-obosta ong·ani koborko man·soani gita, West Khasi Hills a·ani ning·o donggipa Mawkhumkha minggipa songo sobha ong·enggipao bak ra·na gita choir-ni manderangko salangenggipa bolsa Bolero pickup gari Robibar pringo a·sel ong·anichi sakgni manderang a·damon janggi galaha aro mitamrang mata-bu·a man·e jotton ong·tokaha.
Iani bidingo koborna u·iatani gitade, gimik sak 34 choir-ni manderangko gatenba Umdang songoni saksa Shempatkupar Mawsor-ni salangenggipa Bolero pickup ML 07 B 9110, Robibar pring 8 ata bajimango Mawkhumkha songona sokeani ja·man rasong gribee bikpilaha, aro ia obosta ong·anio West Khasi Hills a·jani Umdang songoni saksa bilsi 18-ong·gipa Tra Dearly Daffudil Rashir aro bilsi 17-ong·gipa Sonamika Ryntong a·damon janggi galaha aro bang·a gipinrangba jokkom ong·aha.
Indake ong·engon, a·selo saknaa man·giparangko Riangdo CHC-ni Medical Officer, nanga gita nirok-samsakataniko on·ani ja·man Nongstoin aro Shillong-ni Civil Hospital-rangona nambate sanna gita watataha.
