Williamnagar, February 16: Bristibar salo, 43-Williamnagar Constituency-ni Trinamool Congress (TMC) candidate Alphonsus R. Marak-na chakpaaniko on•a gita TMC-ni tom•bimonganiko Williamnagar-ni Rongrenggre Government Higher Secondary School-o ong•atangaha aro ia tom•bimonganio TMC-ni national general secretary Abhisek Banerjee, Meghalaya-ni TMC in-charge Dr. Manas Ranjan Bhunia, Meghalaya a•dokni gitcham skotong minister Dr. Mukul Sangma, Rongjeng constituency-ni TMC candidate Sengnam M. Marak aro TMC-ni gipin dilgiparangba bakko ra•angtokaha.
Ia tom•bimonganio TMC-ni national general secretary Abhishek Banerjee, jinmana aganprakangengon, batanggimin bilsi bongani gisepo Conrad Sangma-chi re•dilgipa sorkari, Meghalaya a•dokni manderangko bang•en cha•bokaha ine matnangataha. Ia chang Assembly election-o TMC-ko cheate sorkari rikna chol on•genchimode Meghalaya a•doko pilakni gitan namroro silroroaniko ra•bae on•gen ineba Banerjee ku•rachakaniko on•angaha.
Ia tom•anio Meghalaya TMC-ni dilgipa Dr. Mukul Sangma-ba jinmana aganprakangengon, TMC dolo ka•dongchakaniko mesokengani gimin manderangko mittelpilangenba, pilakan ku•cholsan ong•genchimode TMC sorkariko rikna man•gen aro songna-nokna namroro silroroaniko ra•bana man•taigen ine parakataha.
