Shillong, Nov 20: Re·baenggipa 2023 bilsini Assembly election-o National People’s Party (NPP) chegopenba doltangari sorkariko rikna man·aigen ine Sonibar salo, NPP-ni state president Dr WR Kharlukhi, an·tangni ka·dongchakenganiko parakataha.
2023 bilsio NPP doltangari sorkariko rikna sienga aro gipin dolrang baksa bakrime sorkariko rikna nangjawaha ine ua, Mawkhar-o NPP North Shillong Block Executive Committee-ni tom·aniko ong·atanio NPP-ni membor-rangko rakbate kam ka·china didiangaha.
1972 bilsio skanggipa aro bon·kamgipa changna Meghalaya a·doko APHLC-ni chegope doltangari sorkariko rikani bidingo gisik ra·atpilengon, ua somoio gitan apsan dake chegopenba doltangari sorkariko rikna man·na gita rakbate kamko ka·china NPP-ni state president, NPP-ni membor-rangko didiangaha.
Khasi, Jaintia aro Garo Hills a·ja damgittamo NPP dol, komibeoba dam 54 seat-rango susaenga ine janapatengon, ia chang election-o NPP dol, altuaen chegopna man·aigen ine Dr Kharlukhi parakataha.
