Shillong, Nov 15: 2023 bilsini Assembly election-na da•o bilsisa adita jarangnasan dongaiahaon, United Democratic Party (UDP)-ba ia election-na dingtang dingtang gadango doltangko bilakatsona gita kamrangko a•bachengataha.
Iani bidingo kobor ra•timgiparang baksa agangrikengon, 2023 bilsini Meghalaya Assembly election-na skang UDP-ko bilakbatatna ka•dongenga aro ia chang Assembly election-o uamang bang•bata seat-rangko chee, 2023 bilsiode sorkariko dilna ka•dongsoenga ine Sombar salo, UDP-ni general secretary Jemino Mawthoh parakataha.
Adita salrangna skang ong•atanggipa Rajabala bye-election-oba UDP-ni candidate Ashahel D Shira, 7200 vote-rangko man•rikahachim aro uandaken da•o UDP-ni dilgiparang, rakbate kamrangko ka•na kang•kare katokengahachim.
Mawthoh-ni parakatani gitade, uamang UDP-ko dingtang dingtang gadango bilakbatatna gita chanchirimaha aro UDP-ni chadambe dol, me•chik dol aro game ge•e cha•giparangni dolkoba bilakbatatna tik ka•aha.
UDP-ni membor-rang da•o pilakan election-na tarisamsotokengaha aro da•o election-na bilsisa baten dongkuengani gimin uamang December ba January jani ja•mande campaign ka•na a•bachenggnok ineba UDP-ni general secretary parakataha.
Mawphlang bye-election-o 4,004 vote-rangchi chegipa Eugeneson Lyngdoh aro Rajabala bye-election-o 7,200 vote-rangko man•rikgipa Ashahel D Shira-naba UDP-ni central executive committee-ni gita dingtangmancha mande ra•pilskaaniko dakangaha.
UDP-ni skanggipa office-ko rikani da•o matchotangengahani gimin ia office-ko re•baenggipa December ba January jaode nokdonggagnok ineba UDP-ni dilgipa parakataha.
