Manipur, Feb 18: Manipur a•doko lekka pu•onsusaani sepangbaengon dingtangdingtang political partyrang an•tangtangni chu•sokatgimin kamrangko, mikkangchi kam ka•na chanchisoanirangko manderangna u•iatna jotton ka•tokengaha. Indake ong•engon, BJP dolrangni on•gimin manifesto ba dolni miksonganirangko separakgipani gimin Congress dolrang galone aganskaaha. Manipur a•doko opposition-ni dilgiparang, Manipur a•doko silroro-namroroaniko ra•bana, manderangna jakgitele janggi tanganiko on•a aro uandake dingtang dingtang ka•donganirangko uamangni agananiara ong•gramanisan ong•aia.

A•doko AFSPA ni a•sel dos gri manderang sina nangaha aro sastiko man•enga, iani gimin BJP mamingkoba aganja batesa jripmittip dongrongaia” ine congress ni a•gipi aro Manipurna AICCni observer Jairam Ramesh aganaha.

BJP dolrang uamangni manifestoko on•ani salo, Chief minister Biren Singhni dilanio a•dokna silroro-namroroaniko, drugs palbadinggiparangko rim•na man•aha aro dingtang dingtang niamrangko ra•gatanichi indakgipa kamrango chu•sokangkuna ka•donganirangko aganangaha. Bilsi 10 na galchipe donenggipa Autonomous District councilko tangchaatnaba kam ka•angna BJP ku•chakahachim.

Indake Congressrangba uamangni manifesto-o, songsalni manderangna mongsongbate me•chikrangni janggi tanganiko namdapatna aro chelchakaniko on•a, kam gri dongenggiparangna kamrangko nakatate on•a ku•rachakangaha.