Shillong, Jan 13: Meghalayani All India Trinamool Congress dolrang, a•doko toromni bimingko ra•e kajia botenga ine BJPni agananina AITC Meghalayani padot Charles Pyngrope suk ong•gijani kattarangko parakataha. Meghalayani BJP padot Ernest Mawrie, India a•songo foreign fundko man•taipilania Mamata Banerjini a•selsa ong•aha ine mittele agananinaba Meghalaya AITCko matnangahachim. Chinga darangkoba mikkang niteja, pilak toromkon mande ra•a aro manderangni nangnika gitasa kam ka•na jotton ka•ronga, ong•jaode chinga bilakbegipa BJP dolko mija electionoba chena man•jawachim ine re•anggipa West Bengalni election gimin janapjole aganaha.
Gipin a•songoni tangka-paisa dakchakna man•ani niam Foreign Contribution Regulation Act (FCRA) ko Mother Theresa dol ba Missionaries of Charityrangni songgigrikaniko sorkari bon•atahachim indiba ja•mano man•pilaha. Uano missionaries of charityrangnina mangmangsan ong•aija indiba dingtang dingtang Christian dolrangnaba nangchakani aro duk-mikchini ong•aha, indiba iako man•piltaina AITCna agrede darangba ku•rang on•a aro kam ka•na pa•jaha. AITC dol skangrangoia chongipa kristian dolrangna ku•rang on•e dakchakronga gitan ia changoba uamangko nigaljaha. Missionaries ofd charityni tangkarangko man•piltaijagenchimode, uamangni ning•o hajal hajal cholgrigipa manderang, saa-ding•ako man•e dongenggiparang, be•en-bimangni gita bilgripagiparangna namjabea obosta sokbagnokchim. Ia niamko man•bapile on•ana na•a indine aganpilode ian namen dukni katta ong•chongmota ine Pyngrope aganaha.
