Shillong, September 1: India a•songni Jakgitel man•aoni chang 75gipa bilsiko gisik ra•e manianio Border Security Force, dingtang dingtang program-rangko ia bilsini July jaoni December jaona ong•atenga. Songjinmani dingtang dingtang bakrango BSF Band-rang doke dam•e mesokani, friendly volleyball aro football kal•suaani, Motor Cycle rally, Skigiparangni salko maniani salo katsusaani aro cultural program-rangko ong•atna tik ka•aha.
Uandake manchigimin gita Motorcycle rally-ko Shillong-ni Mawpat BSF Camp-oni Sepember 1 tarik-oni a•bachengataha aro ia re•jomaniko September jani 16 tariko Delhi songjinmaona sokahao matchotgen. Motorcycle-o re•jomanio dam 7 a•dokrangko re•pakanggen uan Meghalaya, Assam, West Bengal, Bihar, Jharkhand, Uttar Pradesh aro Delhi ong•anggen. Indake, dingtang dingtang a•jarang jekai Shillong- Guwahati-Dhubri-Siliguri-Maldah-Krishanagar-Kolkata-Durgapur-Hazaribagh- Varanasi-Prayagraj-Kanpur-Agra aro Delhi-ko nappakanggen. Ia re•jomanio gimik sak 30 Motor Cycle chalaigiparang bakko ra•enga. BSF Janbaz ba me•asarangni doloni sak 15 aro BSF Seema Bhavani ba me•chik doloni chalaigiparang sak 15 baksana songjinmani adita manderangba bak ra•paenga.
Meghalaya Police dolni DGP, IPS, Dr. Lajja Ram Bishnoi-ni jakchi nisanko de•doate, IPS, re•jomaniko BSF HQ, Shillong-oni a•bachengataha. Meghalaya Frontier-ni IG, BSF, Inderjit Singh Rana baksana gipin Official-rang aro dingtang dingtang Sorkari officer-rangba tom•anio dongpaaha. BSF Jazz/Brass Band-ni a•songna ring•mittelani gitrangko doke dam•e mesokanirangchi aro BSF school-ni dingtang dingtang chrok-mesaanirangchi tom•aniko an•saoatangaha. Uandake Nongpoh biapona sokahaon Nongpoh-ni Deputy Commissioner baksa Commandant 172 Bn BSF gipin dal•dalgipa manderang rimchaksoaha aro uano kan•dikbegipa program-ko ong•atanio BSF-o pangchake tarigipa Film-ko mesokan baksa Yoga aro dingtang dingtang silchidarerangko mesok-pinikangaha. Pekgipa ringanirangko jakkalani, pekgipa samrangko badinganiko champengani aro kamna mande rimnapani bidingrango lekka paltakrango see tape donanikoba nikna man•aha.
Motor cycle-o re•jomanio dingtang dingtang program-rangko nikangkugen aro iachin chadamberangko Border Security Force ba India’s first line of defence-na gisik on•na ba kamna gisik nangataniko ra•bana miksongani ong•enga.
Motor cycle rally-ko ‘Azadi ka Amrit Mohatsav’-ni bak ong•a ine janaptaitaie ian India sorkarini, a•songni jakgitelani 75gipa bilsiko gisik ra•e dal•bee manianina ja•ku de•ani aro a•songo songdonggipa manderangni chasongni chasongna mingnamgipa bimungko ra•baani, dingtang dingtang jatrangni damsan tom•tome meli-nangrime janggi tanganiko mesok-parakani aro gadang tang•doanirang baksa bang•bea chu•sokanirangko man•aniko Meghalaya Police-ni DGP, Dr. Lajja Ram Bishnoi tom•anio aganparakangaha. Uandake ia rally-ko ong•atanichi a•songni manderangni gisepo meli-nangrimaniko bilakdapatani aro a•songtangna ka•saaniko ra•baani ong•anggen ineba agandapaha.
