Shillong, Mar 7: A•dok damgnini simarango meligrikna man•jaenggipa dam 12 biaprangoni damdokko namatna gita Meghalaya aro Assam a•dokni gisepo Memorandum of Understanding (MoU)-o soi ka•grikaniko da•o March-ni 9 tariko New Delhi-o apsan tom•e chanchirimanio namatna man•gnok ine Sombar salo, Meghalaya a•dokni Chief Minister Conrad K Sangma, an•tangni ka•dongchakenganiko parakataha.
Iani bidingo Assembly-na parakatengon, Assam aro Meghalaya a•dok chief minister-rangko re•baenggipa March 9 tariko agangriktaina gita Union Home Minister Amit Shah okamatahani gimin ia tom•anio, a•dok damgnini simarango meligrikna man•jaenggipa biaprangoni damdok jolrangkode namatna ka•dongengaha ine Sangma parakataha.
Chief Minister-ni parakatani gitade, 2011 bilsio Meghalaya a•dokni a•kanggipa dam 36 songrangoni dam 30-kode Meghalaya a•dokon ong•china recommend ka•aha.
Iani bidingo talataniko on•angengon, West Khasi Hills a•jao Tarabari jolo donggipa song damchet, Gizang jolo donggipa song damgittamoni damgni aro Hahim jolo donggipa dam 12 songrangoni dam 11-de Meghalaya a•dokona re•bagen ine Chief Minister parakataha.
Ri Bhoi a•jaora Boklapara jolo donggipa song damgnioni damsa aro Khanapara-Pillangkata jolo donggipa song damdokoni dambongade Meghalaya a•dokona re•baskagen aro unbaksana East Jaintia Hills a•jani Ratacherra jolo donggipa dambonga songrangoni damgittam Meghalaya a•dok baksa ong•skagen ine Chief Minister parakataha.
