Guwahati, Jan 7: Bilsiantian ong·atrongbaenggipa Assam Book Fair-ko December 29 tarikoni January 9 tarikona Guwahati songjinmani Chandmario donggipa Assam Engineering Institute bakrao ong·ate ki·tap anti atenga.
Book fair ong·atania mongsongbate poraigipa chadamberangna nambegipa cholko oprake on·a; lekka poraina aro sena gisik nanggipa manderangko re·chimongbae agan-golpogriknaba cholko on·a. Book fairko ong·atgiparangni aganani gitade salantian poraigipa chadamberang aro gisik a·ning bite chanchigiparang sokbaenga, ki·taprangko breenga.
![](https://hubnetwork.in/wp-content/uploads/2023/12/WhatsApp-Image-2023-12-16-at-17.45.43-1024x586.jpeg)
Assam Book Fair-ko Publication Board, Assam aro All Assam Publishers & Book Sellers Association nangrime bilsiantian ong·atenga.
Da·o ong·enggipa book fair-o Indiani dingtang dingtang bakrangonisan ong·ja, Indiani a·paloni publisher-rangba dol 135mang sokbae bakko ra·enga. Uamangni aganani gitade, batanggimin salrango Rs kror 2na baten ki·taprangko palnangaha.
![](https://hubnetwork.in/wp-content/uploads/2023/12/WhatsApp-Image-2023-12-13-at-4.14.18-PM-1024x576.jpeg)
Guwahati songjinmao ong·atana agreba ia changni Assam Book Fair-ko North Lakhimpur, Sivasagar, Silchar, aro Halflongoba ong·ata. Lower Assam-ni damgni biaprangoba ong·atkugen, indiba biap aro somoiko tik ong·e aganna man·kuja ine ong·atgiparang aganaha.