Guwahati, Sept 24: Assam a•dokni Darrang a•jao police aro niam gri nape songdongenggipa manderangni gisepo dinggrike mande sakgni so•otako man•an baksana sak 11-na baten saknaanirangko man•ani ja•man Sukrobar salo, ia jolni dingtang dingtang dolrang, konta 12-na bandh-ko ong•atangaha.
Sorkarini a•ao niam gri napdrae songdongenggipa manderangko a•rikgalengmiting somoio police-rangko champengani ja•man Sipajhar block-ni ning•o donggipa Gorukhuti songni manderang, Darrang police baksa dinggrikna a•bachengaha aro uandaken ja•mano Darrang police-rang, adita sak manderangko gona nangahachim.
Re•anggipa September-ni 22 tarikoba Darrang police-rang, ia biapo niam gri songdongenggipa manderangko a•rikgalanio komibeoba ge 800 nokdangrangko a•rikgalna man•ahachim aro uandaken Bristibar saloba gnigipa changna Chhar (Sandbar) jolo niam gri napdrae songdongenggipa nokdangrangko a•rikgalengachim.
Ia a•sel ong•ani ja•man, All Assam Minority Students Union (AMMSU), Jamiat-e-Ulema aro uandakgipa dingtang dingtang dolrangni nangrime bikotgipa All Minority Organisations Coordination Committee, Sukrobar salo pring 5:00 bajioni a•bachenge konta 12-na bandh-ko ong•atangaha.
Bandh-ko ong•atanio maming so•sojengjeng ong•ani gri tom•tome matchotangaha aro konta 12-na bandh-ko ong•atanio pilak dokkanrangkoba chipe donan baksana gari gorarangba bang•gijasan re•ruraaiaha.
Indake ong•engon, niam gri napdrabae songdongenggipa nokdangrangko a•rikgalenggipa biaprang, jekai Sipajhar-ni Gorukhuti, Dholpur I aro III songrango so•sojengjeng ong•anirang dongjana gita chel•chakgipa sipai dolrangko dondapataha ine Police official-rang parakataha.
