Guwahati, Dec 29: Assam a•dokni Assembly election-ko re•baenggipa 2021 bilsini a•bachengachibara ong•atna tarisamsotokengahaon, Mongolbar pringo Congress dolni MLA sakgni aro Bodo People’s Front (BPF)-ni gitcham dilgipa Banendra Kumar Mushahary-ba Bharatiya Janata Party (BJP) dolo napangaha. Mongolbar pringo BJP dolo napanggipa Congress dolni MLA sakgniara Ajanta Neog aro Rajdeep Gowala ong•achim.
Uamangko Assam-ni finance aro health minister Himanta Biswa Sarma baksana BJP-ni state president Ranjeet Kumar Dass aro gipin membor-rang, dingtangmancha Hengrabari-ni BJP office-o tom•aniko ong•atangenba BJP dolona rimchaksoaha.
Adita salrangna skangsan, Golaghat-ni gitcham MLA Ajanta Neog-ko Assam-ni chief minister Sarbananda Sonowal aro health minister Himanta Biswa Sarma baksa sriksrik gronge agangrikahani gimin Congress doloniko ra•galahachim.
An•tangtangko rimchaksona tom•aniko ong•atanio Ajanta Neog, jinmana aganprakengon, BJP dolo mikkangchina chanchisoanirang dongani giminsa ua BJP dolo napaha ine parakataha.
Congress dolko matnange aganangengon, mikkangchina maming chanchisoani aro miksongani grigipa dolde mikkangchina politics-o maming ka•dongani dongja ine Neog aganaha.
