Shillong, August 5: Meghalaya aro Assam a•dokrangni gisepgriko sima-arini bidingo neng•nikanirangko namatna chanchirime dal•dalgipa Minister-rangni meligrike ku•mitchetgrikanirangni ba soi ka•giminni kosako Assam State Electricity Board(ASEB)ni Sabuda aro Jatalong biaprango bijoli sringani siltong-rangko songanina Synjuk ki Rangbah Shnong, Raid Nongtung, Block-II-ni dilgiparangni namnikgijaniko parakataha.
“Chinga Meghalaya sorkarini aro nirokani ning•o ga•akgipa Ri-Bhoi a•jani department-ko ASEB-na bijoli sringani pole-rangko Sabuda aro Jatalang biapo sriksrik songna on•anina namen duk man•a,” ine Synjuk ki Rangbah Shnong, Raid Nongtung-ni Chairman Bill Sohtun aganaha.
Assam State Electricity Board (ASEB), maikai ia damgni songrango niamni a•palo ari ga•changbate bijoli sringani kamrangko ka•na man•aha, namen ra•chakna man•gijani ong•a ine songni manderang janape, ia a•selrangni kosako nirokaniko dakchina Ri Bhoi a•jani department-na u•iatmanahachim indioba da•alonaba mamung ja•ku de•anirang dongkuja ineba parakataha.
Meghalaya a•dokni ning•o bijoli sringna siltong songanirangko dontongate nanga ja•kurangko Assam-ni kosako dakna nanga ine Deputy Chief Minister, Prestone Tynsong aro Ri-Bhoi-ni Deputy Commissioner-na u•iataniko dakmanaha ine dolni Chairman parakataha.
Uandake Assam a•dokni niamni kosako ari ga•badebae kam ka•anirangko champengna Synjuk ki Rangbah Shnong, Raid Nongtung, Block-II-ni dilgiparang nirokanirangko dakenga ineba u•iataha.
