Shillong, May 24: Mawdiangdiang-o gital rikenggipa Assembly building-ni nokking be•gropahani gimin Opposition dolni dilgipa Dr Mukul Sangma, an•tangni suk ong•gijaniko parakatenba, iani bidingo am•sandienggipa dolrangko jakgitele aro kakket ong•e report-ko on•china didiangaha.
Iani bidingo audit ka•na ba name am•sandina gita High Powered Committee (HPC), third party-na chong•motan, IIT Guwahati, IIT Kolkata aro IIT Delhi-na pakwate on•na gita tik ka•manahachim ine nikna man•a.
Ia gital Assembly building-ni nokking be•gropahani gimin an•tangni suk ong•gijaniko parakatengon, ia gital Assembly nokko ia bilsini gisepon man•gnok ine ka•dongsoengachim indiba rang•gitik iandakgipa a•sel ong•aniara namen kragijani ong•aha ine Mukul Sangma parakataha.
Mongolbar salo HPC-ni tom•ani gimin janapatengon, maini a•sel ia nokking be•gropna nangaha aro maikai mikkangchi ja•kurangko de•na miksongenga, uarangko apsan chanchirimaha ine Sangma parakataha.
Ia gital Assembly building-ko rikanirang namjani a•selsa ia nokking be•gropahama ma nokna design tarianio namjani a•sel ong•ahama, ia pilakkon am•sandie, jakgitelgipa report-ko on•na nanga ine Sangma dabiangaha.
