Shillong, March 11: Meghalaya Legislative Assembly-ni session-rango jera ra•grikani aro apsan chanchirimanirangko dakana bate dolsa dolgipinni kosako matnanggrikanirangkosa nikna man•batenga ine a•dokni Chief Minister Conrad K Sangma parakatenba, pilak kamrangon sorkariko matnange aganani pal agan-ku•pattiani aro nambata bewalo chanchirimanikosa nangbatenga ine didianiko on•angaha.
“Kamrangko nambatatna gitasa apsan chanchirimanirangko aro agan-ku•pattianirangko nangenga. Bang•a membor-rangan sorkarina agan-ku•pattianirangko on•enga aro ian namgipa chin ong•a maina sorkariko chalaigipa aro opposition dolni membor-rang apsan chanchirimosa kamrangko nambatatna man•gen,” ine Sangma aganaha.
2007 bilsio bijoliko brena gita songgigrikani bidingo dolsa dolgipinko matnanggrikenggipani gimin janapatengon, iandake matnanggrikaniko bon•ate dolsa dolgipin baksa nambata bewalo chanchirimanikosa ua nangnikengaha maina sorkariko rikaniode batanggimin somoio badiaba dol, mikkangchi badiaba dol aro da•o badiaba dol ong•na man•aia ine Chief Minister talatangaha.
2007 bilsio bijolina songgigrikgipani gimin janapatengon, NTPC baksa songgigrikanio central regulatory committee-ni tik ka•gipa gong kror 13 tangkarangko gamna nangani gimin janapaha aro da•o gamna nanggipa tangkarang batroroangengaha ine Chief Minister parakataha.
Opposition dolni dilgipa Mukul Sangma-ni Assembly-o agangipa kattarangni gimin janapatengon, “Uamang central electricity act-o pangchakesa ja•kuko de•aha ine opposition dilgipa talen aganangaha iarangara nangchongmotgipa ong•a aro niamrangba dongengnaba gnang indiba angni aganna miksonganide ian ru•uta bilsirangoni ong•baenggipa obostasa ong•enga,” ine Chief Minister parakataha.
2007 bilsio bijolina songgigrikanio soi ka•ani ja•mansa ia obostako man•rikrikbaaha ine talatangengon, “Maikai sorkari NTPC baksa songgigrikna man•jaenga ine na•simang aganenga ong•ode ian 2007 bilsio na•simangni songgigrikanio soi ka•ani a•selsa ong•baaha ine gisik ra•bo. Da•ode opposition dolni dilgipa aro gipin membor-rangba ian skangoni ong•baenggipa obostasa ong•a ine ku•rachakaha. Uni gimin da•alo maini gimin MDA sorkari ia neng•nikaniko namatna man•jaenga ine matnange CM-ko aro power minister-ko kam watchina dabianide ong•jaenga,” ine Chief Minister parakataha.
