Baghmara, July 24: South Garo Hillsni Bharat Scout & Guide Association sal 4 ni campko Baghmarani Rangku Memorial Girls’ Secondary Schoolo July jani 20 tarikoni 23 tarikona ong•atangaha.
Ia camp- ni miksonganiara Rovers and Rangers rangna Tritya sopan test aro scout and guide rangna Nipun test ko ong•ate a•dokni governor awardna seokna aro uamangko porikka ra•e watatna ine ong•a.
Ia campo skie on•anggiparangara, Meghalaya Baharat scout & guideni Assistant Secretary Mr. Graval G Marak, West Garo Hillsni DOC Mr. Terang B Marak, Baghmaraoni Justine Momin, South Garo Hillsni Asst. DOC Smt. Riya Tamang ong•a.
Skanggipa campni salo opening ceremony-o Rangku Memorial Girls’ Schoolni Asst. teacher Mr. Finesenbirth B Marak mongsonggipa sokgipa ong•e campko oprake on•an baksana chatro- chatrirangna nama ku•pattianirangko on•angaha. District organising Commissioner Shri. Maikel S Sangma sokbagiparang aro bak ra•giparangna rimchaksoani kattarangko agane campko a•bachengataha.
Ia camp-o adita daka-rikani sika- koani aro gipinrangko skie on•aha jeon south Garo Hills ni adita schoolni chatro-chatrirang, scout and guide, rovers and ranger rang bak ra•angaha.
Bon•kamgipa attamo Capt. Williamson Memorial Govt. Collegeni principal Shri Subar Boro Narzary aro apsan collegeni Asst. professor Dr. Ruhul Ahmed mongsonggipa sokgipa ong•e bak ra•angpaaha.
“A•song aro songsal na•simang gita dakgipa chatro-chatrirangko, na•simangni dangdike on•aniko nangenga, mikkangchi na•simangni re•mikkanganio chu•sokgipa ong•china” ine nambee ku•pattiangaha.
Campni bon•kamgipa pringo All faith prayer aro skul biapko rongtal- an•talate campko matchotataha.
