Shillong, Oct 20: Bangladesh a•song baksa nangchapegipa simarangko kapengna Jaintia Hills Autonomous District Council (JHADC)-ni No Objection Certificate (NOC)-ko on•ani bidingo chanchirimna gita Budbar salo Coordination Committee on International Border (CCIB)-ni tom•aniko West Jaintia Hills a•jani Amlarem-o donggipa Enowell Hall-o ong•atangaha.Ia NOC-ko JHADC, a•a nokgiparangna aro CCIB-na maming u•iatchengani gri on•ahani gimin Meghalaya High Court-o ijahar ka•na gita tik ka•e donangaha.

CCIB-ni parakatani gitade, ia fencing ba sima kaaniko Bangladesh a•songni simaoni India a•song ning•ona 150 yard kana siengani gimin ian a•a nokgiparangna aro ia sima jolrango donggipa dingtang dingtang songrango gamgimin a•arangna noksan ong•atako man•na siengachim.

Ia biaprango fencing ba sima kapenganiara Umngot chibimaonaba sokbana siengani gimin ian Dawki jolo donggipa chadamberangnaba nangchakeaniko ra•baani gita ong•gen ine Dawki Tourism Development Society (DTDS)-ba parakataha.

A•a nokgiparang baksa chanchirimchenggija NOC-ko on•ahani giminba ia committee, JHADC-ko matnangataha.