Shillong, Apr 20: Bangladesh-oni measles-rubella sabisini sima ari gita India-ona sokbae giproroaniko champengsona ine Meghalaya-ni West Jaintia Hills-ni authority-rang nambate nirok-simsakanirangko aro tarisamsoanirangko dakengaha.
April 17 tariko Amlarem Sub-Divisional Office-o orientation-cum-preparedness meeting-ko ong•atangaha jekon V. Kezho dakdilangaha aro sima ari jolrangko sabisiko man•aniko seng•gnang u•ina aro sanna-banani cholrangko ra•na dingtang dingtang dolrang re•bae bak ra•angaha.
Bangladesh-o sak 118 manderang, mongsongbate bi•sarang ia sabisiko man•e janggi galaha aro hajalni hajal manderangba ia sabisiko man•aha ine chanchichipenba obostarang namrorojaenga ine health official-rang mikrakataha. Ia jani a•bachengachipak World Health Organization aro UNICEF-ni agananio pangchake koborko man•soani gitade, ia sabisi ta•raken giproroengani gimin, Bangladesh-ni authority-rang rang•gitik measles-rubella tikkako su•ani campaign-ko a•bachengatna nangaha.
Ia sabisi saksaoni sakgipinona ta•raken batrorona amani gimin sima ari gita India-ona sokbana namen kenani gnang ine u•i-ma•sigipa manderang parakataha. Centers for Disease Control and Prevention-ko janapenba, tikka su•gijagipa ba tikka su•a komigipa biaprango donggiparangona ia measles-ara sima ari gita altuae sokna aro batrorona man•a ine official-rang aganangaha.
West Jaintia Hills-o kam ka•enggipa WHO Rapid Response Team-ni (RRT) membor Dr. B. Puspakarna, sabisini batroroani cholrangni bidingo tom•aniona re•bagiparangna talate on•angaha aro nambate nirok-simsakanirangko dakna nangenga ine janapangaha.
Indake ong•engon, manderangko kenjagokjachina ine ua jolo donggipa health authority-rang didiangaha. Amlarem block-o bang•gija manderangkosan sabisiko man•a ine chanchichipe porikka ra•e niengkua aro uamang pilakan sabisiko man•ja ine nikna man•aha ine Amlarem-ni SDM&HO Dr. A. Khonglah aganangaha.
“Da•o dipetde kenjagokna nangani dongja indiba sabisiko man•enga ine chanchichipgenchimode gong•raken u•iatna nangchongmota” ine ua jinmana parakatenba, be•en ding•ani aro naritchekanirang donggenchimode somoi gita porikka ra•na aro sanna-bananiko dakna sepangbatgipa sanchakram biapona re•angchina didiangaha.
Ia tom•bimonganio dingtang dingtang dolrangni manderang jekai district administration, health official-rang, Border Security Force-ni sipairang, songni-nokni dilgiparang, aro ASHA aro Anganwadi worker-rang bak ra•angaha.
Pilakni bakrime kam ka•anichi kenani gnanggipa sima ari jolrango ta•rake ja•ku de•na, sabisi giproroaniko champengna aro manderangni an•seng-baljokaniko chel•chakna krengenga ine official-rang aganangaha.
