Shillong, Oct 19: Adita salrangna skang matchotanggipa Durga Pujako maniani somoio songsul a·song Bangladesh-o bang·pagijagipa Hindu jatrangko ong·gija dake chadrapani kamko Meghalaya-ni Central Puja Committee (CPC) Mongolbar salo raken jegalataha.
Puja manimiting somoio manderangko ka·saninggija doka-sata dakani gimin mija Robibar salo Meghalaya-ni CPC tom·enba uamangni suk ong·gijaniko parakangaha.
CPC-ni u·iatani gitade, Taliban-ni daka bewalo jat, torom aro ma·mal basee chu·gimik daksamsoe Bangladesh-ni dingtang dingtang district-rang aro a·jarango chadrapaniko dakangaha aro ia kamara ua a·songo songdongenggipa bang·pagijagipa Hindu jatrangni jakgitele manina man·ani bilrangko ra·sekani ong·a. Toromni gita pilak bilrang gnangani mamlao onchepe dakanirang aro uamangko champenganirang salantin ong·ronga, jechin knagija obostarangona sokatasan ong·aija indiba, bang·pagijagipa Hindu jatrangko saknaate sinjetanikoba on·enga, ine janapataha.
Indake ong·engon, Bangladesh a·songo songdongenggipa bang·pagijagipa Hindu jatrangni kosako golmal aro so·so-jengjengko ra·baaniko bakbakan dontongatchina aro dos dakgiparangko niamni ning·ona ra·bachina mol·mole a·song damgnini sorkari aro a·dokni dilgiparangni gong·raken ja·ku de·ataniko nangnike Meghalaya-ni Governor aro skotong minister-ni jak gita memorandum-ko on·naba CPC tik ka·angjolaha.
