Tura, Sept 21: Be·enni gita bilgrigipa dingtangmancha changgipa-sapgipa manderangna, Indian Blind Football Federation (IBFF) baksana Tamil Nadu Blind Football Federation (TNBFA) nangrime, re·anggipa September 18 oni 20 tarikona National Blind Football tournament-ko Chennai-o ong·atangaha.

Mikgrirangna dingtangmancha ong·atgipa robol kal·susaatanio, Meghalaya a·dokoni kal·giparangko man·chape a·songni dingtang dingtang a·dokrangoni kal·giparang re·bae bakko ra·angtokaha ine koborna u·iataha.

Ua tournament-o, Meghalaya aro Delhi-ni gisepo skanggipa kal·susaango Delhi-chini golsako chipaha, indiba a·dokoni re·ange kal·egiparangoni Klingson D Marak gol 2-ko aro Gabriel Nongrim gol 1-ko chipanichi Meghalaya cheaha. Apsandaken, gnigipa kal·susaanioba a·dokni kal·giparang dolgipin mikkangchake kal·gipa Gujarat a·dokko 1-0 golchi amtaienba semi-finalona doangaha.

Semi-finalo, West Bengal baksa kal·susae Klingson Marak-ni gimik gol 4-rangko chiptaianichi Meghalaya, 4-0 chi cheeming final-ona sokeaha indake, rakgipa grik-grik final-ko kal·susaanganioba Klingson Marak-an gol 2-rangko chiptaie Kerela-ni kosako cheenba ua tournament-o chu·sokgipa ong·baaha.

Indake ong·engon, kal·a gimiko gol 9-rangko chipanina, Klingson Marak, highest goal scorer ba gol bang·bate chipgipani boksisna seokako man·aha aro sakgipin kal·rimska Prakash D. Shira-ba best defender-na seokako man·skaaha ine kal·rimskaoni saksa Jebilbang M Sangma, koborna seachi janapataha.