Delhi, September 21: Manderangko katta agane ka·dingatna changgipa Raju Srivastava September 21 tariko uni ka·sagimin jikde aro pilak ripengrangko wate jringjrotna neng·takna re·angaha.
Kobor-na ui·atani gita, Raju Srivastava August 10 tariko Gym-o be·enni rantako ka·engmitingo ka·tongni saaniko man·e ga·akgropanina Delhi-ni AIIMs hospitalona sanna ra·baahachim indiba rasongribee an·sengpilna man·jaha.
A·songni Prime Minister Pa Narendra Modi aro Uttar Pradesh a·dokni skotong Minister Pa Yogi Adityanath, Raju-ni jikgipa baksa siliting gita golpoatanio pilak Raju Srivastava-ni hospitalo sanna-ni koros-rangko on·a aro nanga dakchakaniko on·a ku·rachakaha.
Raju Srivastava-ni manggisiko September 22 tariko Delhi songjinmao so·gen ineba kobor-ba ui·ataha.
