Shillong, Sep 21: Bilsiantian International Day of Peace-ko September-ni 21 tariko manirongengon, ia salko maniani bak gita aro Meghalaya Bharat Scouts & Guides (MBSG)-ni bilsi 50 gapaniko maniani bak gita Budbar salo dingtangmancha agan-chanchirimani program-ko ong•atangaha.
Ia program-ko ong•atanio MBSG-ni vice president Dr MPR Lyngdoh, mongsonggipa sokgipa ong•e chanchirimanio bak ra•angengon, jat baseaniko aro dakgrik dinggrikaniko bon•atna nangengani gimin aganangaha.
India a•songo dingtang dingtang jat aro toromni manderang apsan meli nangrime janggi tanggiparang ong•ani gimin jat aro torom baseani ba saksa sakgipinko mitchigrikani dongna nangja ineba Dr Lyngdoh aganaha.
Jat ge•antian a•songna namako dake, a•songni nitoaniko aro namaniko bariatna nanga ineba ua aganaha.
Jatni daka rikaniko, ku•agananiko, doka dam•aniko, chrok mesaaniko aro jatni dingtang dingtang gunrangko ripingchina didiangengon, a•songo tom•tomaniko rakkina gitasa sorkari, ia pilak jatni daka rikanirangko ripingna kam ka•enga ine MBSG-ni vice president parakataha.
