Tura, Sep 1: Bristibar salo, West Garo Hills a•jani be•enni gita cholgri ong•gipa sak 13 manderangna, samtangtango ong•telaigiparangko ripingani gnang bading chiwalani kamrangko ka•ani bidingo agan-talate on•na gita Inc-Preneurship-ni brigipa session-ko Barefoot Trust baksana Prime Meghalaya nangrime, Prime Tura-ni Incubation Centre-o ong•atangaha.
Ia program-ko ong•atanio West Garo Hills a•jani Deputy Commissioner Swapnil Tembe, mongsonggipa sokgipa ong•e bakko ra•angaha aro ia program-o bak ra•anggipa be•enni gita cholgri ong•gipa manderang, an•tangtangni bading chiwale cha•na miksonganirangko Deputy Commissioner-na talate on•na cholko man•aha.
Ia program-ko ong•atanio Barefoot Trust-ni Managing Trustee Bibhudutta Sahu, program-ona sokbagiparangko rimchaksoangengon, samtangtango ong•telaigiparangko ripinge rakkina kam ka•enggipa bading chiwalgiparangna Barefoot Trust-ni gita dakchakanirangko on•engani gimin agan-talataniko on•angaha.
Be•enni gita cholgri ong•gipa manderangan mikkangchi gipinrangna kamrangko ka•e cha•na cholrangko on•skana man•gen ineba Sahu aganaha.
Ia program-ko ong•atanio bakko ra•e, jinmana aganprakanggipa gipin manderangara, Prime Hub-ni ning•o donggipa Entrepreneurship Ecosystem Development-ni Manager Jeff Rani, Barefoot Trust-jni Program Coordinator Sweet Syiemiong, Prime Tura-ni Manager Bryan SR Marak, Prime Tura-ni Incubation Associate Sabina Koch aro West Garo Hills a•jani SVEEP Icon for PWDs Darlington Sangma ong•a.
Koborko on•ani gitade, ia apsan dakgipa program-ko Ri Bhoi, East Khasi Hills aro West Jaintia Hills a•jaoba ong•atangaha.
