Shillong, Sept 21: India a•songo be•enni gita cholgri ong•gipa manderangnaba sorkari cholrangko on•na kamko ka•enga ine Mongolbar salo, Union Social Justice & Empowerment Minister Dr Virendra Kumar parakataha. Mongolbar salo ua Shillong-ona re•bae, Social Welfare department-ni official-rang aro be•enni gita cholgri ong•gipa manderangna kam ka•enggipa dingtang dingtang dolrang baksa tom•e chanchirimengmiting somoio ia kattarangko aganaha.Prime Minister-ni ‘Sabka Saath Sabka Vikas’-o pangchake uni sorkari, be•enni gita cholgri ong•gipa manderangna dingtang dingtang scheme-rangko ra•gataha ineba Dr Kumar parakataha.Batanggimin bilsisnini gisepo Social Justice & Empowerment Ministry-ni chu•sokatgipa kamrangni gimin janapatengon, be•enni gita cholgri ong•gipa manderangnaba sorkari, dingtang dingtang man•gnirangko on•e janggi tangani gadangko nambatatna jotton ka•enga ine Union Minister parakataha.Be•enni gita cholgri ong•gipa manderangko mangrakbatatna kam ka•engani gimin a•songni Prime Minister-ko mittelpilangengon, India a•songo 2014 bilsini ja•man be•enni gita cholgri ong•gipa manderangna chang 10,000-mangni gita dingtang dingtang program-rangko ong•ataha aro ia program-rangko ong•atanio be•enni gita cholgri ong•gipa sak kror 20-mangna baten gong kror 500-mangni gita dingtang dingtang dakchakani bosturangko on•aha ine Dr Kumar parakataha.Re•anggipa August-September jani gisepo be•enni gita cholgri ong•gipa manderangna ong•atanggipa Tokyo 2020 Paralympics-o India a•songoni susaegiparang, ge 5 Gold, ge 8 Silver aro ge 6 Bronze medal-rangko chebaahani giminba ua mittelpile aganangaha.
Salgro salaram a•dokrango pekatgipa samrangko jakkalanirang batroroengani giminba ua an•tangni suk ong•gijaniko parakangaha aro sam jakkalanio ranta ong•aniara mandena ba uni nokdangnasan ong•aigija songsal gimiknan ong•sianiko ra•baani ong•a ine parakangaha.Ia tom•anio NEC-ni Secretary K Moses Chalai, Meghalaya sorkarini Principal Secretary Sampath Kumar, Commissioner & Secretary MN Nampui aro gipin official-rangba dongpae bak ra•angaha.