Jowai, July 22: Behdienkhlam Festival-ko Biar Aitnar-o maniani da•asal tom•tome matchotangaha. Ian bilsignimangna COVID sabisi a•sel manianiko dontongani ja•man ia bilsi manitaina cholko man•aha.
East aro West Jaintia Hills a•jani ning•o ga•akgipa Raij Tuber-ni dingtang dingtang songrangoni gimik dol 60 tableau-rang bakko ra•angaha.
Behdienkhlam manianian Jaintia Hills a•jao dal•batsranggipa maniani ong•a jekon Niamtre Faithfuls (bebera•giparang) re•anggipa 19 tarikoni a•bachengataha. Ia manianio uamang bebera•atango pangchake dingtang dingtang jatni dakbewalrangko dakangaha.
A•dok Chief Minister, Conrad Sangma New Delhi-ona a•songni President gital Draupadi Murmu-ko mande ra•e tom•aniona bak ra•na re•angani a•selo ia manio bak ra•pana man•jahaoba jachipchang gita nama skanirangko on•atskaaha.
Behdienkhlam maniani bon•kamgipa salo PHE Minister Renikton L Tongkhar, Local MLA aro Social Welfare Minister Kyrmen Shylla, JHADC-ni CEM, Thombor Shiwat baksa gipin MDC-rang, a•jani Dolloi Puramon Kynjing aro Sorkari office-o kam ka•enggipa gipin Officer-rangba katchabee bakko ra•epaaha.
