Tura, Sept 30: September 30, 2005-o Tura aro Williamnagar-o slai-rangchi manderangko goaoni bilsi kolgrik ong·aha, indiba ua andalgipa salko Meghalaya-ni manderang namen gisik ra·atkuenga. Meghalaya Board of School Education-ni (MBOSE) bidingo dingtangatanirangko ra·baanina manderangni jegalanirangko dakengon, police-rang slai-rangko goaha aro uno saksku chatro-rang aro chadamberang janggi gale, nokni manderangna aro tangrikgiparangna duk-mikchirang baksa bang·a sing·anirangko naataha.
Ua salo jegalanirangko dakgiparang dakgrik-dinggrikaniko dakna re·bagiparang ong·ja indiba Garo Hills-ko janggil tike galangengaha ine kenaniosa ong·katbagiparang ong·achim. Meghalaya sorkari-ni Meghalaya Board of School Education-ko (MBOSE) taridapna am·anichi uni dongram Tura-oniko ra·angsrange, Garo Hills-ni mikkangchini bida-ni rama-koba ra·angengaha ine bang·a manderangan jajrengaha.
Garo Students’ Union-ni (GSU) dilanichi chatro-chatrirang manderangko okamaha. Tura aro Williamnagar-ni sorokrangona ong·kate uamang MBoSE-ko Garo Hills-on donchina dabiaha.
Uni ja·manon obostarang namen namgijaona sokaha. Section 144-ni ning·o beng·anirangko dakgenchimoba, hajalni hajal manderang ong·katbae jegalanirangko dakaha. Police dolrang re·bae tear gas aro lathi-rangko jakkalaha indiba tom·tomatna man·jae slai gulirangko dangdikaona sokaha.
Tura-o sakbri manderang aro Williamnagar-o sakbonga manderang siaha. Uamangoni bang·bataan dal·drobaenggipa chadamberang, college-o poraikuenggiparang ong·achim.
Ua salo tangrikgiparang slai-rangni gamani, manderangni katmikbrangani aro uni ja·mano jrip-chi·chang ong·anina an·tangtangni kenjagokanirangko namen gisik ra·kuenga,
Garo Hills-ni pilak manderangan namen ding·chaotokaha. Unomiting Tura-ni MP ong·enggipa Purno A. Sangma sagi Parliament-oni an·tangni kamko wate, manderangko slai goaniko ra·chakna man·gijani ong·a ine aganaha aro Deputy Chief Minister Dr. Mukul Sangma-ba kamtangko wataha.
Niamni gita changgni am·sandianirangko dakaha, indiba iarang manderangni pari-ko batesa tikkota gita dakaha. Tura-o am·sandie nianio police-rangko nangana batpile bil jakkalanina dos galaha, indiba Williamnagar-o am·sandie nianio administration-ko dos galaha, uandake sianggiparangni nokdangni manderang iako an·tangtangko togiani ine ra·aha. 2008 bilsio ia obostako CBI-na pakwatani ja·manoba, kakket bichalko da·ona kingkingba man·jaha. Official saksakoba da·o dipet ia dosko dakanina matnangani dongkuja.
National Human Rights Commission re·bae, dukko ga·akgipa nokdangni manderangna tangkarangko on·skachina aganaha. Uni ja·mano tangka Lak 6-ni chequerangko on·ataha aro saknaaniko man·gipa manderangni sanna-banani korosrangko on·pilskaaha.
Indiba detangtangko a·ao gopmangimin ma·a-paarangnade tangkade mamung saloba aganchakaniko on·jaha. “Tangkarangko on·anichi sianggimin manderangko re·baatgpilna man·ja. Chingna kakket-ko, kakket bichalko aro dos dakgipako rim·aniko nanga,” ine adita bilsirangni ja·mano sianggiminrangko gisik ra·na tom·anio saksani pagipa ka·a be·e mikchi jingjange aganaha.
Da·alo “September 30 Firing”-ara Meghalaya-ni itihas0ni ki·tapko ge·sa tariksan ong·aija, indiba iara namchipgijagipa pari ong·a.
Garo Hills-ni manderangnade, ian ku·rangrangko jripatgipa, kakket bichalko on·gijagipa aro aganchakanirangko nisengsokuenggipa obosta ong·a. Bilsi 20-ni ja·mano, ia obosta-ni jagring simdapkuenga aro jegalanirangko dakanina slai-gulirangko goanichi jrimbegipa damko gamaha ine gisik ra·ataniko on·kuenga.
Na·simang iakoba nina man·gen:
Na·simang iakoba poraina man·gen: Winston Tony Lyngdoh-ko KHADC-ni gital CEM-na seoka
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
Download our app from playstore – Northeast Media Hub
