Shillong, Sept 21: Ia bilsio MBOSE, CBSE, ICSE aro ISC-ni Class 10 aro Class 12 Board porikkarango name chu•sokanggipa chatro chatrirangna Mongolbar salo, Meghalaya a•dokni Information Technology & Communication (IT & C) Department-ni gita dingtangmancha Shillong songjinmani Yojana Bhavan-o program-ko ong•atangenba, laptop-rangko suale on•angaha.Ia program-ko ong•atanio a•dokni Information Technology & Communication Minister Hamletson Dohling, mongsonggipa sokgipa ong•e jinmana aganprakengon, an•tangtangni porikkarango chu•sokgipa ong•na gita rakbee kamrangko ka•ahani gimin chatro chatrirangko mittelpilangaha.Chatro chatrirangni chu•sokanio ma•a paa aro skigiparangba mongsonggipa bakko ra•a ine janapatengon, dedrangrangni iandake chu•sokgipa ong•aniko nikna ian ma•a paarangna aro skigiparangnaba rasong chaani somoi ong•enga aro chadamberangni chu•sokanina ian sorkarinaba mittelpilaniko on•na namen rasong chabeani somoi ong•enga ine Dohling parakataha.Mikkangchiba a•doktangna aro a•songtangna jakkaltogiparang ong•na gita apsan daken krenge kamko ka•angkuchina gitaba ua chatro chatrirangko didiangaha.Ia program-ko ong•atanio dongpae jinmana aganprakanggipa gipin manderangara, IT & C Department-ni Commissioner & Secretary MR Synrem aro Directorate of IT & Communication-ni Director KL Nongbri ong•a.