Meghalaya a·doko aro mongsongbate Garo Hills-oba drugs ba pekatgipa samrangko jakkalani batroroengani gimin Gasuapara jolo donggipa dingtang dingtang NGO-rang, Gasuapara jolrango niam gri ge·enggipa ganjarangni bidingo police-rangna u·iatchengenba, ia jolrango ge·gipa ganjarangko so·e galtokaha.

Sikkim a·doko a·a rurongdapanichi Chungthang jolo ramarang champengataniko man·e jachange dongna nanggipa tourist-rangko Robibar salo, Indian Army Trishakti Corps-ni sipairang jokateaha.Sikkim a·doko a·a rurongdapanichi Chungthang jolo ramarang champengataniko man·e jachange dongna nanggipa tourist-rangko Robibar salo, Indian Army Trishakti Corps-ni sipairang jokateaha.

Jaintia Hills a·jao donggipa a·briko rama cho·sotgipa Sonapur (Sonapyrdi) Tunnel-ko manderang re·rurana man·na gita walo konta 5 ba konta 6-rangna kulliahahaoba tunnel sambajolo a·a rurongdaproroaiengani gimin chipatna nangao ga·akpilaha ine East Jaintia Hills-ni District Commission, Robibar salo u·iatangaha.

2017 bilsini Manipur Assembly election-o Bharatiya Janata Party (BJP)-na United Kuki Liberation Front (UKLF) bobil dol kamrangko ka·e on·aha ine dingtang dingtang dolrangni matnanganiko Sonibar salo, Manipur a·dokni BJP dol raken jegalataha.

Common University Entrance Test (CUET)-ko gipin a•dokrango sena donatako man•gipa Meghalaya a•dokni chatro chatrirangna dingtang tariko porikkako ra•taichina gita ma•mongni Education Ministry, National Testing Agency (NTA)-na ge•etaniko on•ataha ine Bristibar salo, Meghalaya a•dokni Education Minister Rakkam A Sangma parakataha.

Budbar walo, Shillong songjinmao donggipa Mawlai Mawdatbaki jolo, an•tangni an•o dongenggipa jikgipa Stefani Lyngdoh Nonglait-ko so•otani gimin Trophius Nongbri minggipa mandeko police-rang rim•aha.

Domestic worker ba manderangni nokrango kam ka•e cha•enggipa manderang, an•tangtangni man•enggipa hajirarangko bariatchina gita dabie Bristibar salo, jinma re•jomaniko Tura-o ong•atangaha.

Minister an·tangmanchade dos dongani ja·dil-ja·pangko sandie nichenggija sakgipinrangni agananiko knaanio pangchakesa Meghalaya State Commission for Women (MSCW)-ni Chariperson, Ma Phidalia Toi-ko kamoniko ra·galaha ine an·tangni kosako matnange agananirangko Meghalaya-ni cabinet minister Pa Paul Lyngdoh, Bristibar salo raken jegalataha.

A·doko songpanggiparangni aganenggipa Kokborok ku·sikna Bengalini pal Roman oikor-ko jakkalchina dabiange TIPRA Motha-ni chatr o dol, Indigenous Students Federation (TISF)-ni mija Butbar salo Tripura a·dokni skotong Agartala songjinmao tom·tome jingjengataniko ong·atangani ja·mano kajia-golmalona sokangskaaha ine koborko man·soaha.

Meghalaya a•doko drugs ba pekatgipa samrangko jakkalani aro niam gri badingsrukanirang batroroengani gimin iandake songsalna ong•sigipa kamko champengna man•na gita Bristibar salo a•dokni Social Welfare department, Shillong All Faiths Forum (SAFF) baksa tom•e chanchirimangaha.