Tura, Aug 2 : Sonibar salo, pangna bilsi ong·atrongbaenggipa chang 5-gipa Inter Mahari Men’s and chang 3-gipa Women’s Football Tournament-ko Tura-ni Chandmari-o donggipa Government Boys’ Higher Secondary School-ni kal·chakram-o a·bachengaha. Ia tournament-ko ong·atanichi A·chik jatni dingtang dingtang maharirangko apsan rimbana dakchakan baksana iana a·jao donggipa pilak manderangni chakpaani aro gisiko kusi ong·e ra·chakaniko man·aha.
Public Health Engineering, Housing, and Soil & Water Conservation Minister, Marcuise N Marak, ia tournament-o mongsonggipa sokgipa ong·aha. IAS, Vaibhav Sharma, NPYF-ni Working President Dabo Marak, Additional Deputy Commissioner Dolrich B. G Momin baksana West Garo Hills-ni District Sports Officer Saljagring M Marak-ba iano dongpae bak ra·angtokaha.
Ia kal·susaaniko a·bachengate on·ani salo, Laisve Dance Studio-ni jatni bewalo chrokmesaani baksana Dante Marak-ni git ring·ako knaangna man·aha. Kal·susaaniara maikai jatrangko apsan rimbana dakchakachim uni gimin Vaibhav Sharma jinmana aganprakaniko dakangaha. Iani gisepon, Minister Marcuise N Marak, a·doko kal·susaanina nangchongmotgioa rika cho·anirangko namdapatna nangchongmotani gimin aganengon, kal·susagiparang jemangan National level-o medal-rangko man·genchim uamang Meghalaya a·doko sorkarini kamko man·a amgnok ineba ua janapataha.
Ia tournament-ko ong·atani skanggipa kal·susaanio, Rongmitu Mahari 5-1-chi Dawa mahari-ko amataha. Kal·susaani skanggipa minute-o Dawa Mahari-ni Winar D Sangma skanggipa goal-ko chipchengaha, indake ong·engon Rongmitu Mahari-oni Gobang A Sangma goal-1-ko, Gino A Sangma goal-1-ko, Enibirth R Sangma goal-2-ko aro Itnasius R Sangma goal-1-ko chipangskaaha.
District Sports Officer Saljagring M Marak, ia tournament-ko ong·atani bon·kamgipa salo jawilwat kal·anio mingsing minggamako man·gipa Actor John Abraham-ko dal·gipa sokgipa dake rimbana agan-golpogrikanirangko dakenga ine parakataha. Ia kal·susaanio me·asarangni dol 37 aro me·chikrang dol 20 susagrikanirangko dakanggen. Pilak a·bachenggipa kal·susaanirangko Chandmari-o donggipa Government Boys’ Higher Secondary School-ni kal·chakramo ong·atanggen, indake semifinal-rang aro final kal·susaaniko Dakopgre-ni P A Sangma Stadium-o ong·atangskagen.
Na·simang iakoba nina man·gen:
Na·simang iakoba poraina man·gen: Dominic Sangma-ni ‘Rapture’ ja·wilwat gnigipa changna National Award-ko man·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
