Shillong, Jun 3: Meghalaya a•doko chonkalgipa koela a•damrangko chalaina bi•aniko ma•mong sorkari ra•chakaha indiba ia koela a•damrangko chalaina on•na skang ma•mong sorkarini bon•kame ra•chakaniko sengengkua ine Budbar salo, Meghalaya a•dokni Chief Minister Conrad K Sangma parakataha.
Chief Minister-ni parakatani gitade, a•doko chonchongipa koela a•damrangko chalaina ma•mong sorkari on•nade kusi ong•enga indiba bon•kame ra•chakaniko man•kujaskal ua koela a•damrangko chalaiani bidingo chu•gimikkode talate on•na nangnikkujaenga.
Hectare 100-na bate chonbatgipa koela a•kolrangko chalaina on•china India sorkari baksa agangrikenggipani bidingo Chief Minister aganaha.
Koelarangko bikotanio, manderangna janggi tangani cholko on•ani, naljokani aro samtangtango ong•telaigiparangko chel•chakanio apsan ong•e rakkina nangani giminba Chief Minister aganaha.
Ma•mong sorkarini ra•chakanichi, a•doko scientific mining ba niam gita koelarangko bikotna a•bachengaha ine janapatengon, da•o dipet koela a•dam dambrinade permit-rangko on•manaha aro damgittamode kamrangko a•bachengengaha ine Chief Minister parakataha.
Niam gita bikotenggipa koelarangko gipin biaprangona salna a•bachengengaha ineba ua aganaha.
Chonchongipa koela a•damrangko chalaienggiparangnaba a•dok sorkari, koelarangko bikotna cholko on•na gita India sorkari baksa agangrikenga ineba Chief Minister parakataha.
Batanggimin somoirango, galchipgimin koela a•damrango manderang sina nangahani gimin janapatskaengon, a•ja damsaon dam 21,000-na baten galchipgimin koela a•damrang donga aro a•dok gimikniko changopatgenchimode dam 25,000-mangni gita koela a•damrang dongnaba gnang ine Sangma aganaha.
Manderangna janggi tangani cholrangko on•engon sorkari, manderangna naljokaniko on•na aro samtangtango ong•telaigiparangko chel•chakani giminba chanchina nangao ga•aka ineba ua aganaha.
Na·simang iakoba nina man·gen:
Na·simang iakoba poraina man·gen: M’laya sorkari ASF sajinma saani giproroaniko champengsona gita ja·ku de·anirangko dakenga : CM
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
