Tura, Nov 08: Kristian bebera·gipa dingtang dingtang manderangni segipa lekka-ki·taprangko tang·doatna gita miksonge Beautiful Books, Mongolbar salo, Christian Book Fair 2022-ko West Garo Hills-ni skotong Tura-ni District Auditorium paksamsagipao a·bachengate on·angaha aro ia fair-ko re·baenggipa November 12 tarikona kingkingan ong·atgen.

Beautiful Books-ni skotong ba headqaurter-ara Chennai-o ong·a, jeni cheksian Shillong-o dongani gimino uamang, iandakgipa lekka-ki·taprangko mesoke palanirangko Garo Hills a·jani dingtang dingtang biaprango ong·atrongenga, uandake ru·utgija salna skang mangmang Baghmara songo matchotatgipa fair-o bang·a manderangni nina re·baenba lekkarangko breangtokanikoba nikangna gita man·aha ine Beautiful Books fair-ni co-ordinator, Dr. Sengkan K Marak parakataha.

Iani bidingo Hub news-ni kobor ra·timgiparangna aganangengon, Beautiful Books-ni manager, Daniel Francis, Book Fair-ko ong·atanio A·chik a·songni bang·a biaprangon manderangni Kristian ki·taprangna bilongen gisiko nanganiko nikna man·aha aro Tura songjinmaoba apsandaken manderangni gisiko nanganiko man·na gita ka·dongsoenga ine parakataha.

Ia book fair-o mesoke palenggipa lekka-ki·taprangara a·gilsak gimikchini aroba A·chik a·songoni bang·a dingtang dingtang manderangni chanchirikkote aro am·sandie segiminrang ong·a. Ia book fair-o bi·sarangna tarigimin ki·taprang, Bible-ni kattarangko segipa frame-rang, T-shirt-rang, boksis on·ani bosturang, knae roani bosturang aro Krismas-ni bosturang gimikkoba nikna man·gen.