Tura, Aug 30: Da·asalni bako a·dokni skotong minister Conrad K. Sangma West Garo Hills a·jani P. A. Sangma Stadium, Tura-o CM Connect Centre-ko oprake on·angaha. Songdonggipa manderang ia Centre-ko jakkale 1971 – CM Connect-ona ka·ate an·tangtangni neng·nikanirang, uarangko namdapani cholrangko aro uandakgiparangko aganatna man·gen.

Ia oprake on·aniona Meghalaya Legislative Assembly-ni Speaker Thomas A. Sangma, West Garo Hills-ni Deputy Commissioner Vibhor Aggarwal IAS, CM Connect-ni Nodal Officer Banteilang J. Kharshandi MCS, aro dal·dalgipa government officialrang, dilgiparang, CM Connect aro MyMeg teamni manderang re·bae bak ra·angaha.

CM Connect-ara program-san ong·aija, phone number-san ong·aija indiba mingsa chanchiani ong·a ine a·dokni Skotong Minister jinmana parakataha. A·dokni skotong minister aro sorkari manderang baksa agangrikani chol dongna nanggen ine miksongani ia CM Connect-ko bikotaha ine ua talate on·angaha. “Sorkarini skotong manderang baksa agangrikjaode aro uamangni neng·nikanirangko u·ijagenchimode, ian ma·sisretaniona sokata. Iandakgipa obostarang songdonggiparangni chagronggipa neng·nikanirangko namate on·aniko champenggen aro uamangni nangnikaniko on·gijagipa sorkariko rikaniona sokatgen,” ine ua talatangaha.

CM Connect minggittam cholrangchi kam ka·anggen ine skotong minister talate on·angaha.

Skanggipao, technology-ko jakkale manderangko toll-free helplone 1971, Whatsapp service-rang, chatbot-rang aro CM Connect website gita an·tangtangni neng·nikanirangko janapna aro koborrangko ra·na cholrangko on·gen. Uamangni janapatgipa neng·nikanirangko segate ra·gen, nirokatgen aro somoi gita uarangko namatna nanggipa department-rangona watatgen.

Gnigipao, manderang baksa jol agangrikana man·anian ia cholni mongsonggipa bak ong·gen, aro skotong minister-ni bak ra·gipa public program ge·antian CM Connect platform ong·gen jeon uamang an·tangtangni nang·nikanirang aganna man·gen. “CM Connect-ara agananirangko dakani gimin ong·ja – indiba manderangni agananirangko knatimani giminsa ong·a. Chinga an·tangtangko ong·akon dakenga ine chanchigenchimoba, manderangni agananirangko knachakgijade kakketko u·ina man·ja,” ine ua aganangaha.

Gittamgipao, CM Connect Centre-na kam ka·chakani biaprangko a·dokni dam 56 blockrangon a·bachengatgen. Block-ni gadango ong·gipa office-rango kamrangko ka·giparang bang·e dongjagenchhimoba, a·jani skotongrango manderangna dakchakanirangko on·na chu·gimik manderangko rakkigen. Ja·mano ia centre-rang certificate-rang, application-rang, sorkari-ni scheme-rang aro gipin nanggipa kamrangna dakchakanirangko on·na one-stop service hub-rang ong·angskagen.

CM Connect-ara sorkari-ko rikanio manderangko skang done uamangko knachakani aro uamangna kam ka·aniko dakna ine a·bachengatgipa ong·a. Uandake ua CM Connect team-ko manderangko mande ra·e, ka·sae aro ma·sichakani gnang dangdike on·china didiangaha.

“Na·simang manderang baksa agangrikon, na·simangni angni pal agananirangko dakenga. CM Connect-ona re·bagipa manderangko rimchaksona aro uamangna simsakaniko on·na nanga. Uamangko namrengode ba mande ra·jaode, ia cholko a·bachengatani orto dongja,” ine ua talataha. Uandake CM Connect-ko jakkale sorkariko manderangona sepangbatatna, donnuani gri ong·atna aro kam ka·na ine an·tangni miksonganiko parakataha, aro iako dakanirango somoirangko nanggen, indiba mikkangchi ia centre-rangko jakkale pilak sorkarini kamrangko manderangona sokatananian uamangni miksongani ong·a,” ine ua bon·kame aganangaha.

Centre-ko oprake on·ani ja·mano, Skotong Minister CM Connect Centre-o an·tangan asonge manderangni neng·nikanirangko skanggipa changna agananiko knachakaha.

Meghalaya Legislative Assembly-ni Speaker Thomas A Sangma-ba ia oprake on·aniako namen rasong chaani aro kusi ong·ani somoi ine jinmana parake, ia Cemtre-an ia biapo aro a·doko sorkariko rikanio mingsa gamchatgipa chu·sokani ong·a ine aganangaha. Sorkari aro manderangni gisepo chel·grikaniko sepangbatatne inenba ia CM Connect-ko a·bachengataha, aro uandaken songrango democracy, donnuani gri sason ka·ani aro songdonggipa manderang baksa orto gnang agangrikanirangko dakna niksamsoe iako tariaha ine ua janapaha.

Ia Centre-o songsar-ni pilak manderang – songni manderang, chadamberang, game cha·giparang, bading-chiwale cha·giparang aro songrangni dolrangna, an·tangtangni neng·nikanirangko janapna, sing·anirangko dakna, aro sorkarioniko namatani cholrangko sandine bilko on·gen ine ua agandapangaha.

Technology-an ia cholko on·ani mongsonggipa bak ong·a ineba, CM Connect manderangna dingtang dingtang cholrangko on·a – helpline-rang, text, online platform-rang aro social media-rang – uandake neng·nikanirangko donnuani gri aro ta·raken namatpilna dakchaka ine ua talataha. Una agreba, ia cholko a·bachengatanichi songni-nokni volunteer-rang aro chadamberangna darangkoba watchanggijagipa sorkariko rikanio bilakgipa kam ka·ani choko on·a ine ua agandapaha.

Iana skang, Vibhor Aggarwal ia Centre-ko a·bachengataniko manderang baksa agangrikaniko dakani dal·gipa chusokani ong·a ine aganenba, sorkarini kamrang aro scheme-rang manderangna kam ka·gipa ong·a aro CM Connect Centre-ko dakanichi darangkoba watchanggija kam ka·na cholko on·enga ine aganangaha. Ia cholko songrangni ki·tikrangona bilake sokatna man·gen aro uandake manderangna didianiko on·gen aro sorkari rikaniko songni manderangna sepangbatatna man·gen ine ua aganangaha.

Banteilang J. Kharshandi, CM Connect-ko February 15, 2024-o a·bachengataniko gisik ra·atpilaniko dakaha. A·dokni skotong minister-ni niksamsoanichi a·bachengatgipa ia chol je biapo donggenchimoba, je dakbewalko ja·rikgenchimoba, aro jedakgipa nokdangoni ong·genchimoba manderang aro sorkarini gisepo nangrimaniko ra·bana miksongenga ine ua aganangaha. Ia program-ni dingtang dingtang cholrangko jakkale somoi gita neng·nikanirangko namatna kam ka·enga jekai- helpline aro Meghalaya One portal, contact centre-rang, block-level hearing-rang, aro village data volunteer-rang.

Ge·gni toll-free numberrang – 1971 Meghalaya a·dokni a·bachengani bilsiko miksonga, aro 1800-345-651—aro unbaksa dingtangmancha WhatsApp helpline (94363-94363) manderangna koborrangko on·ani dingtang dingtang cholrangko on·na ine aganaha. Ia cholrangko mingbonga ku·sikrangchi agangrika jakkalna man·gen: English, Khasi, Garo, Pnar, and Hindi. Dingtangmancha World-class call cebtre-o sak-25 skie ra·gimin service agent-rang salantian pring 8 bajioni wal 8 bajiona kam ka·enga aro sak 470 data volunteer-rang a·dokni diltubatgipa songrangonaba re·ange kamrangko ka·enga.

Ia cholko a·bachengataoni, CM Connect-o chang 38,266 connect-rangko man·aha aro uanoni chang 31,891 phone ka·anirang ong·a, aro dingtang dingtang blockrango chang-sni agangrikani program-rangko ong·ataha.

Tura-ni CM Connect Centre-ara manderangko bak ra·batatna aro a·dok gimiko sorkari rikanirangko namdapatna ine miksonganio a·bachenggimin ong·a.

Na·simang iakoba nina man·gen: 

Na·simang iakoba poraina man·gen: Horticulture College-ko ta·rake matchotatchina NEHU-ni chatro chatrirang dabia

na·simang hubnetwork.in, oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter- twitter.com/nemediahub

Youtube channel- www.youtube.com/@NortheastMediaHub2020

Instagram- www.instagram.com/ne_media_hub

Download our app from playstore – Northeast Media Hub