Shillong, Oct 21: South West Khasi Hills a•jani badiaba badiaba biaprango Coke karkanarangko kulina manchiengani gimin jegale, Bristibar salo Khasi Students Union (KSU) SWKH unit-ni environment cell, Shillong songjinmani Lumapangad-o donggipa Meghalaya State Pollution Control Board (SPCB)-ni Member Secretary-ko grongeaha.
Ia Coke karkanarangko, South West Khasi Hills a•jani Nongjri, Nonghillam aro Kullang songrango kulina manchiengachim.
SPCB-ni Member Secretary-ko grongeani ja•mano kobor ra•timgipa manderang baksa agangrikengon, Member Secretary uamangna maming ku•rachakanirangkode on•atjaha indiba karkanako kulina permission-ko on•na skang name nichengna gita ku•rachakaniko on•ataha ine KSU SWKH unit-ni president Forwardman Nongrem parakataha.
Coke karkanarangko kuliani a•sel janggi gnanggiparangnasan ong•aigija samtangtango ong•telaigiparangnaba nangchakeaniko ra•baengani gimin South West Khasi Hills a•jao karkana kulidapaniko KSU jegalenga ineba Nongrem parakataha.
“Ia biaprango Coke karkanarangko kuligenchimoba joltangni chadamberangnade ia karkanarango kamrangko ka•e cha•na cholrangko on•gija gipin biaprangonikosa rimbae kamrangko ka•atenga aro iani a•selba a•palrangoni niam gri re•bae songdong a•chaenggiparang batroroenga. Uni gimin da•o mikkangchide chinga ia jolrango skatang karkanarangko kulina on•jawaha,” ineba KSU-SWKH unit-ni president parakataha.
