Tura, April 18: Garoland State Movement Committee (GSMC)ni Chairman aro Confederation of Meghalaya Social Organization (CoMSO) ni dakchakgipa padot ba Vice President, Pa Nikman Ch. Marak-ko ru·utgija salrangna skang matchotanggipa GHADC eleksino GNC dolni tikito susaeming cheahanina, CoMSO-ni dilgiparang kusi ong·bee uko rimchaksoan baksa una mande ra·aniko mija Sonibar attamo Shillong songjinmao dakangaha.
Pa Marak, GHADC-o gital Executive Committee (EC)-ko rikna gita NPP dol baksa bakrime a·dokni skotong minister Pa Conrad K. Sangma aro NPP dolni gipin MLA-rang aro gital seoka man·gipa MDC-rang baksa a·dokni Governor, Pa Satya Pal Malik-ko grongna Shillong Raj Bhawan-ona re·angahachim.
Songsalni aro jatni namgnina re·mikkangdile kamko ka·enggipa saksa ong·pae, GHADC eleksino susaenba chegipa ong·ahanina uni ka·rimska CoMSO-ni dilgiparang uko Shillong-o grongeming una nama-sikaniko on·anga baksana mande ra·aniko dakangskaaha ine ja·pangoni koborna u·iataha.
