Tura, April 18: Gital seokako man•gipa Garo Hills Autonomous District Council (GHADC)-ni MDC-rang Sombar salo Tura-o ku•mikchetaniko dakanggen.
GHADC election-o sak 11 candidate-rang cheani ja•man, National People’s Party (NPP)-ni MDC-rang, GNC-ni saksakamkam MDC aro sakgittam Independent MDC-rangko rime Garo Hills Democratic Coalition (GHDC)-ko songaha aro gital Executive Committee-ko rikna gita Sonibar salo a•dokni Governor Satya Pal Malik-ko grongeahachim.
Chief Minister Conrad K Sangma-ni u•iatani gitade, election-ni somoio manderangna ku•mikchetanirango pangchake GHDC-o bakrimenggipa dol aro MDC-rang, kamrangko apsan nangrime chu•sokatna gita ia dolko songaha.
GHADC election-o skanggipa changna susae Babelapara GHADC constituency-o NCP-ni dilgipa Saleng A Sangma-ko chegipa Rakesh A Sangma-ko GHADC-ni gital chairman-na biming mingaha aro uko chairman songna gita bakan election-ko ong•atanggen ine u•iataha.
GHADC-ni gital chief executive membor (CEM)-na NPP-ni Benedic Marak-ko aro gital deputy CEM-na Garo National Council (GNC)-ni Nikman Ch Marak-ko biming mingskaaha.
