Chokpot, April 7: GHADC-na pu·onaniko ong·atna da·o adita salrangsan dongaiahao, Meghalaya a·dokni skotong minister Pa Conrad K. Sangma, Manipur a·dokni dakchakgipa skotong minister Pa Joykumar Singh Yumnam baksa Butbar saloba sokbaenggipa eleksinna rakbate campaign ka·angtaikuaha.
Rongrikkimgre GHADC constituency-o chakatenggipa dolni candidate Pa Wenison Ch. Marak-na vote-rangko on·e cheatchina gita manderango mol·molna South Garo Hills a·jani Deku anti cha·ramo tom·aniko ong·atanga baksana Chokpot jolo adita tom·aniko ong·atanggipao a·dokni skotong minister jinmana aganprakangaha.
Tom·anio aganengon, sokbaenggipa eleksino basee seokna namen altubea maina Meghalaya a·dokni dingtanganina badia dol kamrangko ka·engachim uko a·jani manderang basena altue man·aigen ine skotong minister parakataha.
Meghalaya a·dokko bilsi 10-rangna Congress-chi sason ka·ani somoio uamang a·dokna chu·onga gita namroro-silroroaniko ra·bana man·jaha, indiba bakkandikgipa bilsi 3-rangni gisepon NPP dol bang·a namroro-silroroatanirangko a·dokna ra·bana gita man·aha jechin A·chik a·songna namen dingtanganiko ra·bana chol ong·gen ine Pa Sangma, tom·ao bak ra·gipa jinmana aganprakaha.
Salni tom·anio Manipur a·dokni skotong minister Pa Joykumar Singh Yumnam-ba bak ra·angpae Deku anti cha·ramo tom·aniko ong·atgipao manderangna aganprakanio, India-ni politics-o Pa P A. Sangma sagini on·gilanganikoba gisik ra·atjole, a·songo namen mande ra·ako man·begipa political-ni saksa niksenggipa dilgipa Pa P A. Sangma sagini a·sel A·chik a·songni manderang namen rasong gnangbea ine parakangaha.
A·jao songdongkamgipa manderang, songsalo janggi tanggipa bang·pagijagipa jat aro kangal-cholgrirangni namgnina dolni kam ka·na mangsonganirang gnanganiko janapatengon, NPP ge·sa political dol ong·anio a·jani manderangni ku·rang ong·na gita kamko ka·enga ine ua aganaha.
A·joltangni political dolrango nanga gita kamrangko ka·na bilrang dongja, iako manderang ma·sina nangchongmota uni gimin a·jatangni nanganirangna chu·onga gita bilrang donge kamko ka·na amgipa dolko basee seokna nanga ineba Manipur-ni dakchakgipa skotong minister agandapangaha.
A·jolni ku·rangrangko gam·batatna gita, NPP dol salgro-salaram a·jol gimikchin ku·rangsan ong·na gita rakbee kamrangko ka·enga ineba tom·ao bakko ra·gipa mande jinmana ua aganprakangkuaha.
Unomiting, South Garo Hills-ni Siju Rongara-ni MLA Pa Rakkam Sangma-ba salni bako skotong minister Pa Conrad K. Sangma aro Manipur-ni dakchakgipa skotong minister Pa Joykumar Yumnam-maang baksa Chokpot-o campaign ka·anio bak ra·angpaenba jolni manderangko niksamsogipa ong·tokchina didiangan baksa policitalni obostarangni dingtanganirangko niate sokbaenggipa eleksino NPP dolna vote-ko on·tokchina gita jinmako mol·molangaha.
Deku songo tom·anggipao, Congress aro GNC-ni niksenggipa dilgiparangba Pa Jonilson Ch. Marak-ni dilanio NPP dolna chakpaaniko on·na gita ku·chakangtokaha.
