Shillong, May 26: Shillong songjinmao COVID man•giparangko donchakna gita corona care centre dake jakkalchengna miksongenggipa biap damgittamko Budbar salo, Meghalaya a•dokni Chief Minister Conrad K Sangma niangaha.
Ia biap damgittamoni damsade Malki-o donggipa Basic Training Centre ong•a, jeon komibeoba ge 100 palangrangna biap donga. Iana agreba gipin damgni biaprangara, Rynjah-o donggipa Industrial Training Institute aro Nongrim Hills-o donggipa District Commerce & Industries Centre ong•enga. Rynjah-o donggipa ITI building-o komibeoba ge 45 palangrangko donna man•gen aro Nongrim Hills-ni DCIC-oba ge 60-mangkode donna man•gen.
Ia biap damgittamon mikkangchi palangrangko dondapna nanggenchimoba biaprangko apalbatatna man•gen ine u•iataha.
Ia corona care centre-rango COVID man•gipa manderangko sanna gita oxygen cylinder aro oxygen concentrator-rangkoba dongen.
Indake ong•engon, ia biap damgittamko corona care centre dakna man•na gita kamrangko ta•rakatchina a•dokni Chief Minister, official-rangko ge•etangaha.
Iana skang apsan salon, a•dokni Chief Minister Conrad Sangma, internet gita dingtang dingtang a•jani deputy commissioner baksa tom•e agangrikangaha aro ia tom•anio a•dokni Chief Minister, sabisi man•na altubatenggipa biaprangko seoke tikarangko su•china ge•etaniko on•angaha.
