Tura, May 26: Budbar salo, Tura-ni MP Agatha K Sangma, South West Garo Hills a•jani Ampati Civil Hospital-o rikenggipa central oxygen supply line-ko nieaha aro unbaksa North Tura-ni MLA Thomas A Sangma-ba dongpae bak ra•angaha.
Ampati Civil Hospital-ko nieani somoio Tura-ni MP Agatha Sangma, South West Garo Hills a•jani Deputy Commissioner Ch Ramakrishna, a•jani SP Siddharth Ambedkar, Ampati Civil Hospital-ni Medical Superintendent Dr JS Momin aro gipin officer-rang baksaba tom•e COVID-19-ni kamrangkoba niangaha.
Ia tom•anio Tura-ni MP, South West Garo Hills a•jani official-rang baksa apsan chanchirimengon, badita sak manderangko hospital-o done sanna bananirangko on•enga, badita sak manderangna oxygen-ko nangenga, badita ge oxygen palangrang donga, badita ge ICU palangrang donga, hospital-o chu•onga gita oxygen cylinder-rang, oxygen concentrator-rang aro oxygen palangrang dongama dongja, samrang chu•onga gita dongama dongja, uarangni bidingo sing•sandie ra•angaha.
Ia tom•anio South West Garo Hills a•jani official-rang, Tura-ni MP-na agan-talate on•angengon, Ampati Civil Hospital-o da•o dipet ge 70 B type cylinder-rang, ge 13 D type cylinder-rang, ge 20 oxygen concentrator-rang baksana COVID isolation ward-oba ge 9 oxygen palangrang donga ine parakangaha. Nanggitan somoirango jakkalna gita ge 15 oxygen palangrang aro ge 3 ICU palangrangko tarie donenga aro hospital-ni doctor aro nurse-rangna online gita ICU training-ko on•enga ineba official-rang, Tura-ni MP-na talate on•angaha.
Ampati Civil hospital-o nanganirangko Tura-ni MP-na talate on•angskaengon, ia hospital-na anaesthetist saksa, gynaecologist saksa aro paediatrician saksa baksana X-ray building-ko dingtang aro hospital-na ambulance-ko on•dapatchina gita Ampati Civil Hospital-ni official-rang, Tura-ni MP-ko didiataha.
South West Garo Hills a•jani district administration aro medical dolrangna ua man•a dipet dakchakanirangko on•anggen ine ia tom•anio Tura-ni MP ku•rachakaniko on•angskaengon, ambulance-ko ua ta•raken ia Ampati Civil Hospital-na on•atgen indiba kam ka•giparangkosa da•o bakande man•kujawa ine Tura-ni MP parakangaha.
