Guwahati, May 23: Covid-19-ko warachakanio Northeast Frontier (NF) Railway-ba a·dok sorkarirangna dakchake on·enga aro uandaken da·al salni bako NF Railway-ni gita dingtangmancha rel gario Liquid Medical Oxygen (LMO)-ko Assam-ona sokate on·aha. Ia skanggipa Oxygen Express train, ton 80 LMO-ko ge 4 ra·chakanio ra·e May 22 tariko Jharkhand a·doko donggipa Tata Nagar-oni re·chakatbae May-ni 23 tariko Assam a·dokni Amingaon-o donggipa Inland Container Depot-ona sokbaaha.
Ia skanggipa LMO-ko ra·chaksona gita Robibar salo, Assam-ni Chief Minister Himanta Biswa Sarma, NF Railway-ni general manager Anshul Gupta baksa Amingaon-o donggipa Inland Container Depot-ona re·angaha. Ton 80 LMO-ko Assam a·dokna on·atahani gimin Assam-ni Chief Minister, ma·mong sorkariko mittelpilataha aro ia LMO-ko salbae on·ahani gimin Indian Railways-koba mittelpilataha.
Manderangni janggirangko jokatna man·gipa ia LMO-ko ta·rakbate aro naljokani gnang sokate on·na Indian Railway, Green Corridor-ko bikotaha aro uandaken ia Oxygen Express train, Amingaon-o donggipa Malda Town-oni Km 630 ong·gipa ramako konta 9-mangni gisepo sokate on·aha.
Dingtang dingtang neng·nikanirangko chagrongna nangengoba Indian Railways, ia LMO-rangko a·songni dingtang dingtang a·dokrangona sale on·enga aro uandaken da·o dipet Indian Railways, metric ton 15284 LMO-rangko ge 936 tanker-rango a·songni dingtang dingtang a·dokrangona sale on·aha.
