Guwahati, Mar 23: Defence-ni koborrangko sriksrik am·sandianina aro Pakistan-ona u·iatanina Assam-ni Dibrugarh a·jani Chabua Air Force Station-oniko Indian Air Force-o kam ka·gipa mande saksako rim·aha ine official-rang parakataha.
Chabua Air Force Station-ara India-ni Salaram-o Indian Air Force-ni kam ka·chakenggipa mongsonggipa biap damsa ong·a, aro uan a·songni Salgro-Salaram aro Himalaya jolrangko naljoke rakkina nangchongmotgipa kamrangko ka·a.
Rajasthan Intelligence aro Air Force Intelligence bakrimenba matnangako man·gipa mandeko rim·aha, aro India-ni dingtang dingtang bakrango iandakgipa daksrukanirangko dake Pakistan-ona kobor on·atenggiparang apalbate kam ka·enggiparang donga ine chanchichipenga.
Official-rangni aganani gitade, Rajasthan intelligence January 2026-o Jaisalmer-o Jhabara Ram minggipa mandeko rim·aha. Sing·doanirangko dakon, ua Pakistani intelligence agency-rang baksa jak donggipa sakgipin mandeni bimungko parakataha, aro uandaken da·o Sumit Kumar-ko rim·aona sokaha.
Sumit Kumar (36) Uttar Pradesh-ni Prayagraj-oni ong·a, aro Chabua-o donggipa Air Force Station-o Multi-Tasking Staff (MTS) dake ka·engachim.
Ua an·tangni ka·enggipa kam-ni kosako re·enba social media-rangko jakkale Pakistan-oni manderangna a·songni military-ni parak ong·gijagipa koborrangko chimonge watataha.
Uandake, Rajasthan intelligence aro Air Force intelligence bakrimenba, Kumar-ko Chabua-oniko rim·aha aro sing·doanirangko dakangkuna Jaipur-ona rimangaha.
“Matnangako man·gipa mande 2023 bilsionin Pakistani intelligence baksa bakrime tangkani pal koborrangko on·atskaengachim,” ine saksa senior official aganangaha.
Sing·doanirangko dakon, dingtang dingtang biaprango Air Force-ko songani jekai Assam-ni Chabua-o aro Bikaner-o Nal Air Force Station-ko songani bidingo parak ong·atna nanggijagipa kattarangko Pakistan-ona kobor on·ataha ine aganangaha. Uarangoniko, Fighter aircraft aro missile system-rangko donani biaprang aro Air Force-o kam ka·giparangni gimin ua agan-talate on·ataha.
Am·sandianirangko dakangkuon, Kumar an·tangni bimungo bregimin mobile number-rangko jakkale social media account-rangko kulie Pakistani manderangko dakchakaha ine u·ina man·aha.
Uko March 2 tariko rim·aha aro Jaipur-ni Special Police Station-o Official Secrets Act, 1923, aro Bharatiya Nyaya Sanhita (BNS), 2023-ni ning·o uni kosako badi ka·angaha.
Ia obostara gipin a·songrang baksa bakrime kam ka·enggipa manderang dongengkua ine mesoka ine official-rang aganangaha aro da·o uandakgipa manderangko am·sandianirangko dakangkuenga.
Na·simang iakoba nina man·gen:
Na·simang iakoba poraina man·gen: Council election-na ST certificate nangtelgipa ong•atna GHADC ra•chaka
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
