Shillong, May 31: East Jaintia Hills a·jani koila a·damo mande sakbonga dapako man·e gimana nangahani gimin police-rang, iani bidingo mokordomako ka·aha.
Ia koila a·damo gimagipa mande sakbongaoni sakgittamde Assam Boko-oni Abdul Karim, Assam Barpeta-oni Abdul Kalam aro Tripura a·dokoni Shyamcharan Debbarma ong·achim. Koila a·damo gimagipa mande sakgniba Assam Silchar-oni ine koborko on·aha indiba da·o dipet uamangni bimingrangko ma·sina man·kujaenga.
Koila a·damo kam ka·enggipa sakdok manderang, May-ni 30 tarik walo East Jaintia Hills a·jani koila a·damo gimaaha ine Silchar-ni Superintendent of Police (SP)-oniko kobor man·soani ja·man East Jaintia Hills a·jani police-rang, Sombar pring 6:00 bajimango ia manderangni gimagipa koila a·kolko sandie man·aha.
Robibar walo mikkarang waanichi, light-rang chu·ongjanichi aro mikrontangchi nikgipa manderang dongjahani a·sel ia biapko sandianio ja·manchakaha ine police-rang u·iataha.
Ia a·selni bidingo chubata gadangni official-rangna bakan koborko on·ataha aro ia koila a·damo gimagipa manderangko district administration, dingtang dingtang sandigipa dolrang baksa sandina a·bachengataha. Ia biapona ja·mano bakan State Disaster Response Force (SDRF)-ni sipairangba sokangaha.
East Jaintia Hills a·jani SP Jagpal Singh Dhanoa-ni u·iatani gitade, ua biapo Inspector General of Police (Law & Order)-ni dilanichi gimagipa manderangko sandina a·bachengatahaon, May 30 tarik attamni 5:00 bajio ong·gipa a·selni bidingo parake on·na mande sakdok re·mikkangbaaha.
“Mikrongtangchi nikgiparangni sakki on·ani gitade, ua somoio rang·san dynamite gopretani ja·man rang·san chirang koila a·kol ning·chi napangaha aro ua biapo koila cho·enggipa mande sakbonga ua biapon gimaaha,” ine Dhanoa parakataha.
Mikrontangchi nikgipa manderangni sakkirangni bidingo janapatengon, ua somoio saksa Nizam Ali minggipa sordar, a·sel ong·ako nikgenchimoba koila a·kolo gimagipa manderangko jokatna mamingkoba dakjaha aro batesa ua somoio jokrikgipa manderangko ka·mikkenatenba ua biaponiko a·rikataha ine SP parakataha.
Sakkirango pangchake ia a·selni gimin FIR-ko Khliehriat police station-o ka·doangaha.
